Jowai: Ka Jaiñtia Youth Development Society (JYDS) kam chibynta wow kyntu yei sap i phong ki khon khynroo khyllood, ha kani ka 16 tarik da pynman ko ya ka Basketball Friendly Match hapyrdi ka Seng Samla Katholik Parish Jowai pyrchah ya ka St. John Bosco’s Youth ha Bosco Pnar Jowai.
U President ka Society u Damanleki Lathong da e u ya ki ktien pdiang burom ya kiwa chakhut sñiawbha, ya kiwa yalehke kamjooh ya kiwa wan sakhi lang ya kani ka yalehke Basketball.
Ha kani ka sngi ya ka yalehke da wan wow sakhi lang ya ka da u Kitbok Nongtdu kam u Chief Guest, u Bisharbha Pala kam u Guest of Honor, u Dawan Lyngdoh (MDC ka JHADC) kam u Special Guest wa kiwi de kiwa chah khut sñiawbha.
U Kitbok hei klam yong o da e u yaroh u ya kiwa kitkaam ka Society kamjooh i kyntu wow nang kreh bha ya ki kaam wabha, da e u leh i kyrkhu kyrdoh ya kiwa yalehke waroh arliang.
U Bishar Pala heiklam yong oo da kyntu u ya waroh kiwa ya emlang wow man ki kiwa chimkhia u pyndep hok ya ki kaam wa bha, kamjooh da e u leh i kitbok kitrwiang ya kiwa yalehke.
U Dawan Lyngdoh hei klam yong oo da kyntu u ya kiwa yalehke wow man ki kiwa em burom heipor wa yalehke, da kyntu u leh kamjooh ya kiwa kitkaam yong ka JYDS wow man ki kiwa kreh chitom ha ki kam wa damut damang neibynta i bha i miat ha waroh liang.
Ya kani ka Basketball Friendly Match da yoh rah yei naam jop da ka Seng Samla Katholik Parish Jowai.
U General Secretary ka JYDS hei klam sñiawngooh yong o da e u i khublei sñiawngooh ya waroh kiwa da yarap ya ka Society khamtam ya u Bro. Barnabas Khriem Director ka Bosco Pnar Jowai kamjooh ya kiwa pait ya ka Bosco Pnar Jowai kiwa da kyrchaan ya ka Society neibynta wow pynman ya kani ka Basketball kawa lai bait lai ryntih kamjooh kawa phooh wapheiñ.
Discussion about this post