Jowai: Ka seiñ Society for Urban and Rural Empowerment (SURE) da pynman ko ya ka esikai wa chi bnai hajrong i rukom rep wa i rukom psan mrad boonjait ha ka chnong Moosakhia, Amlarem Sub Divsion yong ka West Jaiñtia Hills.
Ya kani ka esikai da wan wai da ka B.M. Majaw kawa man kam ka District Horticulture Officer (DHO) yong ka West Jaiñtia Hills haka 25 tarik uni u bnai hei emlang kiwa kitkaam ka SURE, u Waheh Chnong wa kiwa kitkaam chnong.
Ha i klam lamphrang, u H.H. Mohrmen da batai u wa kani ka esikai toh kawa da kyrchaan da ka Meghalaya State Skill Development Society (MSSDS) hapoh ka Supporting Human Capital Development in Meghalaya Package #21 Under SFC. Kani ka esikai toh hajrong ka Integrated Farming (Small Farmers) kawa sikai ya ki rukom rep rukom psan mraad neibynta kiwa rep ki wym em ki thaw wa heh.
Ka B.M. Majaw hawa e yei klam da kyntu ko ya kiwa rep wow chimkhia ki ya ki esikai wei wow pynemkaam yeiwa yoh ki na ki. Da pynkynmoo ko wa ha kani ka pyrthai dooh khih dooh kreh boon ki khynroo khyllood kyruiñ ki cha ka kaam rep næ psan mrad. Da pynkynmoo ko leh wa ka sorkar da sangeh ko wow e sboh dawai cha kiwa rep, katwa kamtæ da emkaam wow pynemkaam da ki sboh khlem dawai wei wow sdang ya ka rukom rep Organic neibhah da ku i dawa ya kam kini ki mar rep.
Ya ka yalang ha kani ka sngi da pynlai da u Habandajop Lyngdoh uwa man uwi na kiwa esikai wei da yoh yei klam na u Waheh Chnong ka chnong Moosakhia u Ribiang Paksang wa u Realsing Muksor.
Discussion about this post