Jowai: Ka Indian Army ynne ka sngi da wanrah ko ya ki nar kiwa da dep chna chwa kiwa sah sa du wow pyndait donhi yow man ki kam ki thaw pynchong (Platform) ya ki Pump wei da wanrah ya ki yow pynemkaam ha ka krem mooyong wa 5 wa kawa 15 wei da yooluti wa pyn mynstep da dep u pyndait ya ki.
Ka wi na ki Pump ka Kirloskar Brothers Ltd da pyndait ya ka ha ka krem mooyong wa 8 wei da pynbiang leh ya ka Generator wei daw sdang u taan um hadien wa pyndep sa ya kawi ka Pump ka Kirloskar.
Ka Indian Army da wan ki kamwa 50 ngut nadooh ynnin yow yarap u chna ya ki thaw booh ya ki Pump wa thymme kiwa poi khlem em wa ki thaw booh namo ki Platform kiwa da hap ka bor district wow phah chna da ki hi.
Ya ki Platform ka krem mooyong wa 8 wa 9 da dep u pyndait ynnin ka sngi.
I taan um da ki Pump warim dang pteiñ hi i heiwa ka CIL da pynemkaam ko ya ki Pump yong ka deilang 33 kynta nadooh ynnin i janmiet hadooh ynne ka janmiet 5 waje wei da sai um 4455000 liter.
Ka Kirloskar da pynemkaam ko ya ki ar tylli ki Pump nadooh ynnin i janmiet hadooh 5 waje i janmiet ynne ka sngi wei da sai um 2880000 liter.
Ka KSB da dam ki wow pynemkaam ya ki pump yong ki nadooh ka 26 tarik uni u bnai neidaw wa sih ki.
Discussion about this post