Jowai: Ka Meghalaya High Court da pdiang ko wow bood dien ya ka PIL wa yaleh da u muktiar u Pillan T. Sangma wow dawa naka yungbichaar yow phah ko ya ka sorkar jylla u pyndep wow chna ya ki sarok kamjooh wow pynheh kiwa em hapoh ri-loom Garo.
Ynnin ka 29 tarik ka yungbichaar da phah ko ya ka chnat PWD wow jubab ki da ka Affidavit heiyatoh wa u sarok wa em haka thaaiñ Williamnagar, Garobada cha Selsella, Rajabala wa Trikikila hapoh 3 tayaw.
Ha u snem 2018 u P.T. Sangma da yaleh mukotduma u leh wow dawa naka chnat PWD wow pynchna ya u sarok na Tura cha Baghmara, Baghmara cha krem Siju wa Baghmara lyngba Rongara cha Balpakram National Park wei haka 29-11-2018 ka High Court da phah ko ya waroh ki Contractor wa emkti wow pyndep ya kini ki sarok hapoh u bnai nyngkong uni u snem.
Kamtæ ha uni u snem da yaleh PIL biang u Sangma wow dawa u chna wow pynheh ya u sarok Rongsak Tinalo uwa pynyabi yaka NH-34 (Rongsak Tinali) cha Williamnagar wa ki thaw wa em cha jan. U pynchna ya u sarok wa sdang nadooh Simsang RCC Bridge (Dolong) wa lai na Warimagre cha Samanda Block lyngba Nengsang Adugre (Durama) wei u pyndep noh yei chna yaka Rongap Bridge (Dolong) ha Baija iwa man i thaw hapyrdi ka Rongsak Tinali yow pynyabi waka chnong Williamnagar.
Ha ka jooh ka mukotduma da dawa leh wow pynchna ya u sarok na Garobadtha cha Selsela, Selsela cha Rajabala, Rajabala cha Pulbari, Pulbari cha Tikirkilla ha South West Garo Hills kiwa man kiwa da sih bha.
Discussion about this post