Wan sa ki Army Engineers ka Gajraj Corps yow yarap pyndait ya ki thaw booh ya ki Pump ha Ksan

Jowai: Ka Indian Army da phah phah ko ya ki Army Engineers na Gajraj Corps kiwa da wan wow pyndait ya ki ar tylli ki thaw booh (Platform) wow pynchong ya ki Pump thymme deiwa pynemkaam ya ki tiar ki tar wa wanrah da 20 tylli ki kari ka Indian Army chadooh cha Ksan, East Jaintia Hills Hills District wa em kiwa chah kset hapoh ka krem mooyong.

Ki Gajraj Corps Engineer da kreh ki wut wut wow yarap ya ki bor District wow chna ya ar tylli ki Platform wa jrong 80 wa 100 phut hapoh 32 kynta heiwa u Deputy Commissioner ka District u F.M. Dopth uwa da emlang wa pait ya ka kaam da yaroh yei kaam wa da leh ki Engineer ka Indian Army wa yahkhmat da u Major Asutosh Rawat wa u Col. Pottu.

Ka Kirloskar Brothers Limited dang pteiñ hi ki wow pyndait ya ki ar tylli ki Pump yong ki ha ka krem mooyong wa 8 ha kini ki 3 sngi sngi tangwa suki bha lai i kaam chakhmat. Neiliang ka District Administration da paan chooh chooh ko ya ki Engineer na kani ka Company hanlada man ki leh kiwa dang sdang kreh thymme hanlada ym man ki kawa da chemphang kam kiwa da poi nachwa wei lada ye wow phah Pump chooh, wei neiliang ka Kiloskar Brothers Ltd. da pyntip ki wa em sa du ar tylli ki Pump wa ki wa ye ki wow e nalor ki 6 tylli kiwa da e chwa wei da yooluti u ye u phah ki du hadien ka 4 tarik uni u bnai.

Neilang ka bor district won da ye ki wow booh 4 tylli ki Platform iwa tam ya ar tylli kiwa ye ka Indian Army wow booh. Da paan yarap leh naka CIL wow phah ya ki Engineer yong kiwa ye wow pyndait sa ya ar tylli ki Pump yong ki kiwa da em ha kani ka thaw.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Haka 31-03-19, 8 ngut kiwa hayung hasem na ki 16 ngut kiwa chah kset da phah wan ya ki cha ka yung krehkaam u DC kawa kynthup ya ka kurim u Kitu Miya uwa dang tip pyrtuid thymme uwa man uwi na kiwa chah kset hapoh ka krem mooyong wei da e cha ki ya ka Cheque wa mar T. 2 Lak wa da pyllait daka sorkar India nalor ka T. 1 Lak wada yoh ki naka sorkar jylla.

Ynne ka sngi won ka Kirloskar Brothers Limited da ye ki wow pyndait ya ki artylli ki Pump yong ki haka krem mooyong wa 8 wei u sdang u taan um hadien wa dep u pyndait ya ki Pipe wei da phah leh ya kawi ka Generator cha ka krem mooyong wa 5 yow ye u sdang u pyndait noh sa ya ki artylli ki Pump.

I taan um na ki Pump kiwa da dep pyndait chwa dang pteiñ hi ki.