Jowai: Ka Narpuh Border Area Joint Action Committee (NBAJAC) da pynsñiaw ko yei sñiawsih wa khroo neidaw wa dooh bordiñ ka thaaiñ Narpuh ha kine ki sngi na ki daw ki wym tip. I pyndooh bordiñ wa man ka sngi ha ki thaaiñ Narpuh man ko i dooh nong wa khroo ya ki paidbah chong chnong nadooh ki khynnah skur kiwa em ha i puræ puthi, ki PHC, wa i dooh nong kawa khroo khamtam ya kitu kiwa pynemkaam da i bordiñ hawa chet wa tu kamjooh kiwa khih kiwa kamai da ka bordiñ.
U Minot Sympli, Vice Chairman ka NBAJAC uwa man leh kam u Waheh Chnong ka chnong Chiehruphi da pynsñiaw u yei sñiawsih wa i sñiawdiaw mynsien hajrong i dooh bordiñ khak khak ha ki thaaiñ Narpuh nadooh ka chnong Nongsning, Mynkre, Chiehruphi wa hadooh Ratacherra. Da ong u wa ha chisngi yoh bordiñ du kamwa 20 minit wei tip i wa kam kiwa chong chnong wa ym em ki Transformer kiwa sih kiwa dang pynchna ka MeECL.
U Sympli da pynbaad u wa i dooh bordiñ toh wa ka MeCEL ka e bordiñ ko cha ki karkhana pynmih khyndaw-bilat kiwa em ha thaaiñ Narpuh wei da pyndooh won ya ki paidbah wa chong chnong. Kamtæ neiliang yong oo da kyntu ya ki bor wa pynlai ya ka MeECL wa toh u pyniang ya ka bordiñ cha ki chnong ki thaw yong i khang wa ki bru kiwa pynemkaam bordiñ u yoh myntoi ki.
U Daiapherbha Lamare, Secretary ka NBAJAC, da ong wa, “I lehbeiñ ka MeECL da man ko man ko chawa palat ha ka thaaiñ yong i. Ka Load Shedding kawa toh u krehkaam nadooh 9:00 PM hadooh 12:00 AM ha ki thaaiñ yong i wei ka MeECL ka chim kabu ko wow pyndooh bordiñ boon kynta ha ka chisngi,” kamtæ na i liang ka NBAJAC lyngba kani ka kyrwoh ka kyntu ko ya ki bor pynlai wa toh u pynbiang bordiñ smat ki cha kani ka thaaiñ wei lada ym leh, ka seiñ ym yohsa wow khang tala chisyndon ya ka Sub Station kawa em ha Lumshnong khnang yow man ko ka daisarom ya ka MeECL wa ya ka sorkar hi waroh kawi.
Discussion about this post