Dawa pynsangeh ka KSU yei chna sarok khappood wa i ker narchieh katwa ym pu su bai thaw

Jowai: Ka Khasi Students’ Union (KSU) Narpuh Circle ynne ka sngi da lai yachem ko wa u DC ka EJHD u FM Dopth wow dawa pynsangeh chwa ya i chna ya u sarok wa i ker narchieh khappood waka ri Bangladesh nadooh Lailong chadooh Huroi wa Hingaria. I dawa wow pynsangeh chwa ya kani ka kaam toh hajrong wa ka sorkar ym pu su ko ya ka bai thaw bai lutsan (Compensation) cha ki tre thaw kiwa chah ktah na ini i pynkreh ya u sarok wa i ker narchieh.

Kamwa man kattæ i kreh lai i chait chait, ki bri kwai bri pathi yong ki bru da dep tympra tangwa i su won dang sah. Hadien wa ka seiñ da yoh ujor ko na ki paidbah, ka seiñ da lai yachem ko wa u DC ha ka 3 tarik u Kmaichonglad (Dec) 2018 wa ynne ka sngi ka 4 tarik hapoh i yahkhmat u KS Suchiang President, u Deibormi Dkhar General Secretary wei da emlang leh ki tre thaw wei da synran lang ya ki da u Ohibait Dkhar President KSU JHDU, Garland S Manner General Secretary wa u Shaniahskhem Dkhar Asst. Financial Secretary KSU JHDU kiwa lai yachem wa u DC.

Hawa yoh u yaklam wa kani ka kaam, u DC u da ong wa ki paidbah waroh kitu kiwa chah ktah ki thaw ki bhaw na i pynkreh ya u sarok khappood wa ka Bangladesh toh u e pyrtuid ki cha u Waheh Chnong yong ki khnang wa ka yung krehkaam yong oo u ye ko wow leh ya iwa emkaam.

Hadooh katni dang yang i ya i pyrtuid na ki Waheh Chnong ya kitu ki thaaiñ kiwa chah ktah, da pyntip u DC. Tangwa neiliang ka seiñ ka dawa ko na u DC wow pynsangeh chwa ya i kreh katwa ym pu dep su. U DC da pyntip u wa da dep pynsangeh ya i kreh tangwa ka seiñ da chem ko wa dangpteiñ hadooh katni.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka seiñ da pynkynmoo ko leh ya u DC hajrong i wym ye ka sorkar wow su ya ka bai lutsan (Compensation) cha ki tre thaw wa chah ktah na i pynkrehkaam ka NHAI ya u sarok NH -44. Hajrong ini won, u DC da pyntip u wa ka da dep su kamwa 90% cha kitu kiwa chah ktah ki thaw ki bhaw hadooh kiwa chah ktah ki thaw rep wei iwa sah katni toh wow su ya ki yung bru kiwa chah ktah.

Ka seiñ ka pynkynmoo ko leh hajrong i khrong dan ki Toll Gate ya kawa da e leh da i thoh cha u DC dang ha kini ki khajiak sngi, u DC da pyntip u wa da dep phah ya i thoh cha u Project Director ka NHAI PIU, Shillong wow e yei pynche hajrong kani ka kaam. U DC da kyntu u leh ya ka seiñ wow yang hadooh wa da yoh pynche na kani ka chnat.