Jowai: Ki ar ngut kiwa chong chnong ka Elaka Nongkhlieh da thoh ki cha u Secretary ka Executive Committee ka JHADC wow pynsangeh chwa ya ka sorjamin hapoh ka Elaka Nongkhlieh neidaw wa em boon ka kynrum kynram wa iwa ym sñiawthooh yumut ha waroh ki liang.
Ki ar ngut da ong ki wa ka liang u Pyrkhatieibha Pajuh uwa da thung ka Council kam u Acting Dolloi ki da yooh roit ki ya i hok yong ki paidbah wa chong chnong wei heipor wa thung Acting Dolloi ya u (L) Nusmon Dkhar ki da dai lilam ki leh wot ya i thaw ka Elaka khlem da pyntip ya ki paidbah chong chnong.
Kamtæ hajrong kani ka yurim kiwa da em thaw chwa hapoh ka Elaka da kyrpaad joor ki wow pynsangeh chi syndon yei lai leh sorjamin khnang yow lait na kiwon kiwon ki jia kiwa poi chadooh ka yachoh yadat kamwa da jia ha ki por wa nachwa.
Chooh chooh da ong ki wa kiwa da em thaw chwa ym chah ki da kammon kammon leh wow pynman ka Council ya ka sorjamin ha kiwon kiwon ki bynta ka Elaka katwa ym pu yoh Dolloi wa pura ka Elaka.
Ya kani ka chithi da phah leh cha u CEM ka JHADC yow chimkhia u ya kani ka kaam.
Ki ar ngut wa da soi ya ka chithi toh u Kampher Sukhlain wa u Syrpaibha Sukhlain.
Discussion about this post