Phah tuklar ka NEHUSU ha u Lat wow yoh biang ya ki thaw yaleh Exam ha Shillong

Shillong: Ki khynroo khyllood ka skurbah North Eastern Hills University (NEHU) hapoh ka lama ka North Eastern Hills University Students’ Union (NEHUSU) da phah tuklar ki ha u Lat ka jylla, u Tathagata Roy neibynta wa ka skurbah NEHU u yoh biang ko wow pynman biang ya ka Exam National Eligibility Test (NET) kiwa pynman da ka University Grants Commission (UGC) ha ka jylla wei kamjooh ya ka Council of Scientific and Industrial Research (CSIR) NET ha Shillong neibynta wow yarap ya kiwa puræ Post Graduate.

Kiwa lai puræ da yoh mynsien ki hadien wa yachem ki wa u Lat neidaw wa da kular u wow tuklar wa ki bor wa toh u pait yow wanrah biang ya ka thaw yaleh Exam kamwa da dawa ka NEHUSU.

Ka President ka NEHUSU, ka Genuica Majaw da ong ko wa kani ka rai wow phah tuklar ha u Lat ka jylla toh wa hadien i yachem wa u Montri Rangbahdooh, u Conrad K Sangma ha u Thohlakhmi (Feb) uni u snem tangwa ym em mih soh ko hadooh katni.

“Hadien wa i yachem i wa u Conrad dap i da i kyrmen wa ka sorkar u chimkhia ko wow leh iyi iyi tangwa sepai noh ko neidaw wa hadooh katni ym leh iyi iyi yei dawa yong i,” da ong ka Majaw.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong ko katni ka jylla da boon snem ym em ko ya ka thaw pynman Exam CSIR-NET laitnoh ya ka UGC-NET kawa em ha Qualapaty, Shillong wei kani ka thaw leh ym ye ko wow pynbiang lut katkam ki emkaam kiwa puræ wa yakhun ya ki Exam hadien wa da pynemkaam bait da ki kor Computer.

Da pyntip ko leh wa kamwa man katni kiwa yaleh ya kini ki Exam da hap ki wow lai bait cha Guwahati. “Ini da wanrah yei chitom ya kiwa yaleh Exam khamtam ha ka lai ka wan wa hap wow pynbiang ya ka por wow hap thooh ya i thaw pynman Exam nalor i lut i sep,” da ong ko.

Da kdaw ko leh wa kini ki Exam man ki kiwa emkaam neibynta wow man kam ki Assistant Professor næ Junior Research Fellowship ha ki thaw puræ yong ka ri.

Ha iwi i liang da pyntip ko wa u Lat da kular u ya ka Union wow rah u ya kani ka phang wa dawa kiwa puræ ha ka sorkar jylla wei daw bood dien u leh ya kani ka kaam khnang yow lait ki nei chitom.

“U Lat da ong u wa i pynslem yong ka sorkar ye u man wa em ka Election cha Lok Sabha. I sñiawhun i ya i yachem wa u Lat wei kyrmen wa ka sorkar leh u chimkhia noh smat ya kani ka kaam,” da ong ka Majaw.