Jowai: Ka Seinraij Jowai ynne ka sngi da pyndep ko ya ka lehkmen Chaad Sukra kawa sdang nyngkong ha Madan Mynkoi Pyrdi wei ha uni u snem heipor wa Mih Iaw da hiar sa haka Biar ka Blai heiwa da pynman leh ya ka lehkmen ha kani ka thaw chwa wow pteiñ cha Iawmusiang.
Ha ka bynta wa nyngkong ha Madan Mynkoi Pyrdi u DC ka EJHD u FM Dopth da man u kam u kongsan wei da yoh leh yei ktien wai phang na u Arwotki Sumer, GS ka SRJ uwa da khana yei yumut ka Chaad Sukra.
Neiliang u kongsan hei klam yong oo da ong u wa ka Chaad Sukra man ko kam ka waje kawa pynyoo ya waroh nadooh ki warep, kiwa lai puræ hadooh kiwa kreh sorkar wa ha kini ki bnai waroh da sdang thymme.
Da ong u leh wa kani ka lehkmen man ko kam wow leh burom yaka bei rymaw kawa pynbiang ya ki dieñ ki siej, ka la-ær wow riñ mynsien, wow pynyoo leh yei maya ya ka bei rymaw kawa pynbiang pyndap yeiwa emkaam ki bru.
Da pynkynmoo u leh ya iwa boon wa chah ktah ka rymaw na ki kaam wa leh u bru.
Ha iwi tawon i liang da ong u leh wa ka Chaad Sukra man ko ka rynsan ya kiwa boon wow pynyoo yei sap i phong yong ki nadooh kiwa chaad wa kiwa chna sur wei da kyntu u leh ya waroh wow man kiwa ya tylli.
Ha Iawmusiang won da wan sakhi da u Atul Chandrakant Kulkarni, Chairman, SEIL & Member BGIIM, Shillong kam u kongsan hei emlang leh u DC ka WJH u CP Gotmare.
U kongsan hei klam yong oo da ong u wa kamwa ha kylleiñ ki thaw ki lehkmen ki ya ka bei rymaw da iwa yooluti wow yoh u dap ka rep ka riang, kamtæ uwi pa uwi na i leh i yalumlang i heini yow yoh yei kyrkhu kyrdoh u Blai kynrad lyngba ka rymaw.
Ini i rukom lehkmen wanrah ko yaka suk ka saiñ i man chi payu para nalor wow e ngooh yaka bei rymaw ha ki liang waroh.
Da ong u leh ha pyrthai hi waroh kawi ka klam ko chaphang i emkaakam wow sumaar wow pynneh pynsah yaka rymaw, kamtæ ka jaitbru Pnar ka da em chwa ko i emyathoh wow sumaar yaka rymaw lyngba ka ngooh ka dem yaka bei rymaw wei kamjooh wow sumaar ya ka.
Da kyntu u leh wow pyntikna i neibynta ki juk wow wan, u yada ya ka rymaw yow lait i u chah tim ha ki.
Discussion about this post