Shillong: Ka Election wow jied ya ki MP cha ka Lok Sabha ha kani ka kynti da ku bha ko wei da man ko leh kawa ar hei boon kiwa thap Vote kiwa mih ynnin ka 11 tarik yow pynemkaam yei hok yong ki.
U Chief Electoral Officer (CEO), u Federick R Kharkongor da pyntip u wa hadien wa yoh lut i yukheiñ, kiwa thap Vote da poi ki waroh cha ka 71.03% ha ini i jied ya ki MP na Shillong wa Tura Parliamentary Constituency. Ki kynthai da mih rap boon ki bar ya ki chynrang heiwa du ki kynthai da poi 73.68% katwa ki chynrang da poi ki 69.03%.
Hawa kheiñ na i em kiwa thap Vote waroh hapoh ka jylla kiwa da poi 19,14,795 ngut, kiwa wan wow thap Vote MP da poi ki 13,64,259 ngut wa kynthup ya 7,11,081 ngut ki kynthai wa 6,53,178 ngut ki chynrang ha waroh ar tylli ki Parliamentary Constituency.
“I thap Vote ha kani ka kynti man ko kawa da ku bha wei da wan wa ar ko ha i mih kiwa thap Vote lada wyrchaw wa kiwi ki Election MP ha ka jylla. Hadooh katni i mih kiwa thap Vote wa boon dooh toh ha u snem 1998 kawa da poi cha ka 74.38%,” da pyntip u CEO.
U Kharkongor da ong u wa ha sor leh i mih kiwa thap Vote da ku bar ya kiwi ki snem.
Chooh chooh u CEO da ong u wa hawa wyrchaw waka Election MP kawa man ha u snem 2014 da em i ku kiwa thap Vote cha ka 2.53% ha waroh ar tylli ki Parliamentary Constituency.
“Ha Shillong Parliamentary Constituency kiwa thap Vote da poi ki 65.49% kawa da ku 2.21%, katwa ha Tura Parliamentary Constituency i poi kiwa thap Vote da man ko 81.20% kawa ku 3.06% bar ya ka Election ha u snem 2014,” da ong u CEO.
Da pyntip u leh wa haka Shillong Parliamentary Seat lada chim katkam ki MLA Constituency, ka Sutnga-Saipung toh kawa mih boon dooh kiwa thap Vote kawa da poi cha ka 74.26%, katwa kawa duna dooh toh ha Mawlai kawa poi du 59.32% . Ha Tura Parliamentary Seat, ka Selsella toh kawa boon dooh i mih kiwa thap Vote kawa da poi hadooh 92.20% katwa kawa duna dooh toh na South Tura kawa wan 71.97% kiwa thap Vote.
Discussion about this post