Jowai : U MDC ka Sohmynting Khliehtyrshi u Lakhon Dkhar hadien wada wan pait wan sylli u yaki yung wa chah khyndang haka la-ær haka chnong Madur, West Jaiñtia Hills District kawa haap hapoh ka Constituency yong oo, ynnin ka sngi won da lai yachem u waka BDO yong ka Thadlaskeiñ C&RD Block ka B. Blah wei da em chirup deilang ki manyung wa chah ktah.
U Lakhon da ong u wa hei lait li pait li sylli yong oo da chem u hadooh kamwa 23 tylli ki man yung wa chah ktah kynthup nadooh kiwa chah ktah joor wa kiwa chah ktah malu mala.
Kamtæ da kyrpad u yaka BDO wow smat pynyoh yarap yaki man yung wa chah ktah neibhah kamwa man kattæ em kiwa da hap wow li sah cha ki yung wa em yatoh ki wei em won kiwa yaleh u tymmoh malu mala yei yung tang yow hoi u sah.
Sa iwi leh da kyrpaad u wym toh u pynyoh du daka Temporary Relief neibhah ha kam kini ki por ym yahap de wa da toh i por hiar slap, wei wow e yarap leh katkam i bor chah pynjæd pynpra ki yung.
Hadien i yaklam, neiliang ka BDO da phah ko wow wanrah yaki dur yong ki yung wei wow pynbiang waroh i emkam, heijooh i por kular ko leh wow chimkhia yeini i kaam wei u yaklam wa u DC ka West Jaiñtia Hills District yow smat u pynyoh yarap.
Discussion about this post