Jowai: Ka School Managing Committee (SMC) yong ka Iapmala Presbyterian Upper Primary School deilang waka Balang kamjooh ka chnong hei emlang u Pastor A. Lyngdoh kam u kongsan wa sakhi lang u Dr. Sankey Shangpung, symbood kongsan uwa man kam u Executive Member ka JHADC uwa pait yaka chnat puræ puthi wa kiwi kiwi da wan ki wow wai pynku kyrdan ya ka Presbyterian Upper Primary School cha ka Secondary School haka 15 tarik uni u bnai.
Ya ka yalang da pynlai da u Preciously Lyngdoh uwa man kam u Chairman ka SMC wei da yoh yei klam na u waheh chnong u Lamphrang Lamurong, u P. Shangpung uwa man kam u Secretary Chnong, u B. Lyngdoh uwa sikai warim, T.Bn. H . Lapasam uwa jooh man leh kam uwa sikai, u Drowel Lapasam, u Kablick Shangpung, u Rev. A. Lyngdoh, u Dr. Sankey Shanpung wa naka Khrawbok Lamurong kawa man kam ka Head Teacher.
Kiwa klam da pynsñiaw ki yei kmen wa khroo wa hanlada da chem boon i eh i khoo wa da maad ka Balang kattu ka skur da jan dap ko 25 snem.
Ha i klam u Dr. Sankey Shangpung da pynsñiaw u yei sñiawngooh ya ka SMC neibhah neidaw yong ki kani ka skur da ye ko wow poi cha kani ka thong wei da kular u leh wow e yarap poisa T. 2 lak yow pynbiang ya ki ben ki chuki wa kiwi kiwi de.
Neiliang u Rev. A. Lyngdoh da sneiñ da kyntu u ya ki khynnah wa ya kiwa sikai wei da kitbok kitrwiang u wa kani ka skur daw ku chooh chooh ko chakhmat.
Ini toh katkam ka kyrwoh naka Khrawbok Lamurong, Head Teacher kawa man leh kam ka Secretary ka SMC.
Discussion about this post