Shillong: Ki paidbah ha ka chnong Shella da yaleh pyrchah ki ya ka hukum ka yungbichaaar yong ka District Council, kawa da maham wow khang u wow pynman dorbar jied ya kiwa kitkaam ka Dorbar Shnong Shella.
Hanlada neiliang ki bor pynlai District ryngkat ki pulit da lai ki cha kani ka thaw hadien ka hukum yong ka yungbichaar, neiliang ki paidbah da yaleh pyrchah bait ki wei da beh ki ya ki pulit deiwa pakhot da ki chuki wei brait sumrit dung. Katkam ka Video wa da yoh lyngba ka WhatsApp da sakhi yei yaleh pyrchah na ki manbei ka chnong wei ha ini i yakhun boon ki pulit da mynsoo ki.
Kam wow pynkynmoo heini ka Dorbar Shnong kawa da man ha ka 23 tarik uni u bnai da chim ya ka rai wow pynthymme noh ya kiwa kitkaam ka Dorbar Shnong Shella yong u snem 2019, neibhah waroh chi kattu ym yoh u pynthymme neidaw ki mukotduma kiwa em hapoh ki yung kasari.
Hajrong ini i pynbna ka dorbar shnong neiliang ka yungbichaar ka District Council, da pynmih ko ya ka hukum wow khang yei thmu wow pynman ya ka dorbar wow jied ya kiwa kitkaam wa da thmu wow pynman ynne ka sngi.
Ka hukum na ka yungbichaar, ha ka 26 tarik uni u bnai, da khang ko ya u Wantei Swett wa u Tobias Tiewdop wow pynman dorbar ki ha Yung Dorbar Shnong Shella ha ka chnong Jasir.
Ka yungbichaar da phah ko leh ya ka chnat Pulit lyngba u Officer In-charge ka Shella Police Station wow pynkrehkaam u ya kani ka hukum wei wow e ka bui hajrong kani ka kaam cha ka yungbichaar.
Discussion about this post