Jowai: Ka Mukhaialong Dorbar Chnong ynnin ka sngi 30 tarik da pynthymme ko ya kiwa kitkaam yong ka heiwa da chimbynta lang da waroh kiwa chong chnong kynthai wa chynrang, khynroo wa ki waheh.
Ha i jied kaam Waheh Chnong, ki paidbah da tyrwa pyrtuid ki ya u Hundred Phawa uwa man kam u Secretary Chnong warim wa ya u Rimiki Sana uwa ksoh ya ini i kaam ha kini ki le snem, wei da jied waheh chnong deiwa nyngkong phah yeiñ ya kiwa kyrchaan u Hundred Phawa wei da pynbood sa ya kiwa kyrchaan u Rimiki Sana.
Kamtæ u Dołloi ka Elaka Jowai uwa pynlai ya ka jied Waheh Chnong da sakhi u wa ki paidbah kiwa yeiñ wow kyrchaan ya u Hundred Phawa rap boon ki wei da pynbna ya u Hundred Phawa kam u Waheh Chnong wa thymme ka chnong Mukhaialong khlem da emkaam wow niaw kti næ khlieh bru neidaw wa da yoo u Dolloi yei boon paid wei da e kti u syndon ya u Waheh Chnong wa thymme wow pynlai ya ka Dorbar wei da jied symbood Waheh Chnong ya u Hima Sana, Secretary Chnong da jied ya u T. Sana, Asst. Secretary u D. Kyndait, Chairman u Phool Kyndait, wa ya ki dkhot pynlaikaam (Executive Body) yong ka Dorbar Chnong kamwa 12 ngut katkam ka rukom.
Ha kani ka Dorbar jied wa kitaam ka chnong, ki paidbah da mynjur ki leh wow krehkaam ki 3 snem. I jied ya kiwa kitkaam ka chnong ha kani ka sngi da man ko kawa jop wei kawa hunlang da waroh kiwa chong chnong.
Discussion about this post