Shillong: U Chief Executive Member ka Khasi Hills Autonomous District Council, u Teinwell Dkhar da pyntip u wa man u uwa smat wow bichaar biang ya i yabhah na ka T.52 klur cha ki MDC.
“U bichaar biang i ya iwa emkaam. I kwah i wow phyllu yumut wa ki, lada em kawon kawon ka luti wei i leh ym kyntait i yeiwa tyrwa ki,” da ong u CEM hawa yaklam hadien ka yalang ka UDA ynne ka janmiet.
U CEM ka KHADC da khut yalang wa jhan u ya ka synrop United Democratic Alliance (UDA) wa synchaar ha KHADC ynne ka janmiet hadien wa ki MDC da phah ki ya ka chithi wow dam noh u kyrchaan na ka UDA kawa dawa ki wow pynman yalang heiyatoh waka T.52 klur wei kamjooh ya ki kaam ha KHADC kawa da kut noh i e por haka 30 tarik u bnai wa da dep.
U CEM uwa man leh u Chairman ka UDA da khut yalang u ynne ka janmiet, tangwa ki MDC kiwa da dam wow kyrchaan ya ka People’s Democratic Alliance (PDA) ym em poi ki.
“Nga pdiang O wa ym em khut ya ka yalang ka UDA kattu la ar bnai duna, nga khut O katni kamwa da e por, tangwa ym em poi ki deiwa ong wa em ki cha kiwi ki yalang. I da phone leh ya ki tangwa da jubab ki wa da miet palat,” da pyntip u CEM.
Napyrdi ki MDC kiwa em ha ka UDA kiwa dang kyrchaan ya ka Executive Committee wa yahkhmat da u Teinwell da em ki sa du 11 ngut wei kiwa poi cha ka yalang, da em ki 10 ngut laitnoh u MDC ka Ranikor, u Nasar Marwein uwa da pyntip wa ym chait u.
U Teinwell da pyntip u wa i yachem wa ki MDC ka UDA daw pynman biang mynstep ka sngi hadien wa ym em poi lut ki MDC ka kynhun synrop. Ki MDC kiwa poi ha ka yalang toh 2 ngut ki NPP, 2 ki HSPDP wa 6 ngut na ka UDP.
Hawa kylli ya ini i wiar ki MDC, neiliang u CEM da ong u, “Nga ym ye O wow batai ya i wiar ki wei lada ym sñiawsuk dei ki ya nga kam u CEM, hawa nga Phone O ki ong ki wow yachem mynstep.”
Discussion about this post