Jowai : Ynne ka sngi ka FKJGP- Jaintia Hills District hapoh i yahkhmat u President ka seiñ u ma Tuesday Lytep, wa kiwi kiwi kiwa kynthup ya kiwa thoh khubor da lai pait ki ya ki kattu katni ki RCC Check Dam (Dam Um) ha ka wah Mynkrem kawa yachem wa ka wah Myntdu hajan ka chnong Jowai.
Yeini da leh hadien wa ka seiñ da yoh ko yei pynbad na ki paidbah wa kitai ki dam man ki kiwa da piah du hadien kattu katni snem heiwa ka seiñ da paan ko da ka RTI na ka Ophis u Sub-Divisional Officer ka Soil and Water Conservation, Jowai Division wei lyngba kani ka RTI da chem yei dor yong kawi pa kawi ka Check Dam, wa ki pyrtuid ki kattu katni kiwa yoh myntoi.
Heiyachem wa uwi uwa rep da ong u wa yei kreh da leh heipyrtuid ka diah u ka ka kong Nigthwing Dkhar and Party da kani ka tnat wei da ong u wa du hapoh chisnem da piah kani ka dam wei ki sahep na Soil & Water Conservation Department da wan pait ki yeini. Wei hadien ini uni u bru da haap u wow chim daka pooh-shilum wow rah ya ki moo kiwa heh hajan katai ka dam khnang wow yada ko ya katai ka dam kawa pyllai um cha ki lyngkha u.
Ha kawi won ka dam kawa da pynkreh hei pyrtuid ka kong Lahun Suting wa kiwi kiwi da yoo sakhiat yei kreh habra i kreh khaler, heiwa heithaw u moo da thap da ki dieñ chirup wei khyndawbilat.
Da kreh ya kani ka dam hei dor T. 11.38 lak wei katkam ka jubab RTI kani ka dam toh u neh ko hadooh 50 snem, tangwa lynngoh u yoo wa da piah da oor ko du hadien le soo snem.
Em hadooh 20 tylli ki scheme kiwa pynkreh da ka Soil & Water conservation hapoh ka Mynkrem RVP kawa hap hapoh ka RIDF Nabard Loan kawa man yong u snem 2010-11.
Ka FKJGP da ong ko wa heiyatoh weini daw ujor ko cha ki bor sorkar wei toh u takit bha yeini i kaam iwa da pynemkaam bakla ya ka poisa u paidbah.
Discussion about this post