Jowai: Ynne ka sngi i chong bichaar ya ka mukotduma u Lber Laloo da ka Supreme Court pyrchah ya ka hukum ka NGT wow khang tih mooyong hapoh ka jylla Meghalaya dang pteiñ hi ko wei ka yasaaid ynne ka sngi da neh ko chi kynta nadooh 2 waje hadooh 3 waje nohchariñ ka sngi.
Neiliang uwa yasaaid aiñ (Amicus Curiae) wa thung neibynta wow yarap ya ka Supreme Court, hadien wa ym bien de ka Dima Hasao Student Committee wow embynta ha kani ka mukotduma, da pynsñiaw u ha khmat ka yung bichaar wa ha khliehdooh wa ya ka hukum yong ka NGT ym em hi wot wa burom ka hapoh ka jylla Meghalaya, wei da pynyoo u leh ya kiwi kiwi de ki kaam wa da lai pyrchah ya ka hukum ka NGT hapoh Meghalaya.
Uni uwa yasaaid aiñ da e u leh ya ki kattu katni tylli ki bui (Report) wa tip kam ki Citizen Report wow pynyoo wa ym toh de u chah wow tih mooyong hapoh Meghalaya na kiwa boon ki daw katkam wa da pynmih ha katai ka Citizen Report.
Da pynkut u ya ka yasaaid deiwa ong wa u mooyong wa da dep tih chwa wa dang sah 32 Lakh Metric Tonne wa uwa ym pu em dep kit toh u e kti noh cha ka Coal India Limited wow challan cha Guwahati da ki kari sorkar wei wow dai lilam ha Guwahati, Assam da ka Coal India Ltd.
Ka yunbichaar wa em burom ka da pynsangeh noh ko chiteiñ ya ka yasaaid yong ynne ka sngi deiwa ong wow pteiñ biang ha ka 7 tarik uni u bnai.
Kawa dang sah wow yasaaid, toh sa uwa yasaaid aiñ ka sorkar India. Neiliang yong kiwi kiwi kiwa yasaaid aiñ ki da dep yasaaid lut ki waroh hajrong ka hukum ka NGT ha ka mukotduma u Lber Laloo.
Discussion about this post