Jowai: Na ki por cha ki por ood ki paidbah yaka rukom chna bai bordiñ ka MeECl Khliehriat Sub-Division iwa pynman ya ka KSU Laskeiñ Circle wow lai sylli ya ka thaw su bai bordiñ ha chnong Iooksi, West Jaiñtia Hills ynne ka sngi wei da chem ko chiboon ya i lehbakla yei rukom chna bai bordiñ ka MeECl.
Da chem wa ki bru kiwa da dep su lut haki bnai wa da dep tangwa da wan biang ko haka rukom sahram (Outstanding Bill), da em won ki bru kiwa wa na manyung wa dooh (BPL) tangwa ka bai bordiñ da poi ko palat T. 600 chaneiñ, kawa da pynlyngoh chooh chooh toh ki bru kiwa yoh ya ka bai bordiñ hadooh T. 552119 wei da su tista ki man ka bnai.
Hawa yaklam ka seiñ wa kiwa chim ya ka bai bordiñ da ong u wa ki ym tip ki neibhah man i bakla kiwi kiwa kreh.
Hawa Phone cha ka In-charge ha Khliehriat kawa pait ya kani ka thaaiñ da ong ko wa ym tip iyi iyi leh yei leh khalær kiwa chna ya ka bai bordiñ.
Ka seiñ da ong ko wa ha u bnai wa da dep da chem yei jooh biang i kjut wei da dep yachem ya u SDO yong ka Revenue uwa da kular wow pynbait, tangwa hadooh katni ym pu em bait.
Kamtæ ka seiñ da ong ko wa ini i leh yong ka MeECl man ko chawa palat wei khlem da pyrkhat de ya ka yap ka im u paidbah, wei daw lai yachem ya kiwa rap hanein lada ka yung krehkaam ka Sub-Division ym ye ko wow pynbait ya i bakla.
Ini toh katkam wa pyntip u President KSU Laskeiñ Circle u Balawantei Suchiang.
Discussion about this post