Jowai: Ka seiñ Hynniewtrep Achik National Movement (HANM) Laskeiñ Block Circle, ka pynsñiaw ko yei pyrchah joor yei leh yong ki Chairman/Secretary ki VEC yaka aiñ Mahatma Gandhi National Rural Employment Guarantee Act (MGNREGA), wa ki pynkulmar næ pynbiej ki ya kiwa kreh 100 sngi, heiwa ka VEC ki phah sai ki ya ka poisa næ ka bai mylla yong kiwa kreh Job Card na ka Bank Account wei wow lai e ka cha ki, nalor wa slem u poi ka poisa bai mylla spah sngi ha Bank Account.
U President ka seiñ u E.J. Law, da ong u wa kitu kiwa ym kreh næ mylla tangwa em ki ya ka Job Card, ka poisa psiah ko hapoh ka Bank Account yong ki wei ya kam kini ki leh ki VEC ki phah sai ki ya ka poisa wow lai e ha kti yong ki. Da ong u wa hei yong sakhiat kitu ki wym em hi tang u kreh ym toh hi u psiah poisa ha Bank Account yong ki.
Da ong u leh wa ka seiñ da chem ko ya kam kini ki kaam da ki khmat kam haka chnong Shangpung, Pamanik, Mynska wa kiwi ki VEC wa em hapoh ka Block Laskeiñ, ki phah kohngooh yabor ki yaki paidbah wow leh ya iwa ong ki wei lada ym leh ki, ka VEC da ong ki wa ym rah chooh ya kani ka Scheme.
U Law da ong u leh wa ki VEC heithaw wow pynchlur ya kiwa mylla wow kreh da i bor bru yong ki, da thooh daw ki deiwa ong wa lada kreh da i bor bru daw chimpor ware wei da pynemkaam ki da ki kor pooh chiloom (JCB) ya ki Scheme waphær waphæ deiwa e Sub-Contract ya ka Scheme yow yoh nong ki samen. Ka seiñ da maham ko ya ki VEC kiwa pyndap da ki pyrtuid ki bru Muster Roll kam kiwa em Job Card, wei wym toh de u pynemkaam da ki kor pooh chiloom næ wow e Sub-Contract.
Discussion about this post