Jowai: Ka JSU-War Jaintia Circle (WJC) hapoh i yahkhmat u President, u Eddy Kery Pohtam wa u General Secretary u Kerrydiam Lamin da dawa ki na ka sorkar wow chna pynmiat ya u sarok wa em ha Tamabil kawa man leh ka thaw wa da mang wow chna ya ka Integrated Check Post – Dawki.
Ka seiñ sñiawkhia ko wa kammon ha kiwi ki thaw ha Ri India wa da mang wow chna ya kini ki ICP – Phase 1 kiwa man ki Dry Port namo ki thaw khayi ha ryngkaw wa ya ka Dawki ymye wow pyndep wei da sakhi leh wa da pynsangeh yei krehkaam wow chna ya ka.
Ini i sangeh i kreh da ka Land Port Authority of India wow chna ya ka ICP Dawki da pynsih ko ya ka thaw wa u sarok iwa da pynman ya ki kari wow sah wei wow kylla ki khamtam kiwa na ki chnong wa em ha khappood kam ka Nongtalang, Amlympiang, Amdoh, Rhongkum, Amsku, Muktapur, Syndai, Hawai Bhoi wa kiwi kiwi.
Ka seiñ da ong ko leh wa lada ka Land Port Authority of India ymye ko wow chna ya ka tangwa ka PWD toh u leh ko yeiwa emkaam.
Da kyntu ko leh ya u MLA u ka thaaiñ u Lahkmen Rymbui uwa man leh u montri ka chnat Border Areas wow chimkhia u yeini wow pynsmat noh yei chna pynmiat ya uni u sarok khappood (Border Road) wa lai nadooh Tamabil chadooh Muktapur. Ki bru kani ka thaaiñ im ki nei rep wei u sarok man u ka bynta wa kongsan ya ki wow pynpoi ya ki mar rep yong ki cha ki yaaw ki hat. Uni u sarok ym em de u chna pynmiat ya oo da ki 20 snem hanlada ki MLA yong kani ka thaaiñ War Jaiñtia kiwa em hei bor boonsien ksoh ki ya ka chnat Border Areas ymem u chimkhia ki yeini.
Discussion about this post