Shillong: Ka High Level Committee (HLC) ynne ka sngi, da rai ko wow phah biang ya ka Shillong Municipal Board (SMB) wow kheiñ khlieh bru biang ya kiwa sah ha Them Iewmawlong (Sweeper’s Colony) wei ya ini da epor wow pyndep hapoh chi bnai.
U symbood montri rangbah, u Prestone Tynsong uwa man leh u Chairman ka HLC, da ong u wa ka sorkar da rai ko wow elaad biang sa chisien ya kitu ki bru wa sah ha Them Iewmawlong wow pynsakhiat chwa wa ka sorkar daw leh ko yeiwa emkaam.
U Prestone da ong u wa i phah kheiñ khlieh bru biang toh hadien wa da em i pyrchah na ki bru kiwa sah ha katai ka thaw wei da emkaam wow leh biang yeini i kaam.
Da ong wa ya ini i lai kheiñ daw pynmih wei daw pynbna paidbah ha ki khubor.
Chooh chooh da ong u wa katkam ka yukheiñ wa da yoh hadooh katni, em 128 ngut kiwa kreh ha ka Shillong Municipal Board wei 56 ngut kiwa kreh ha kiwi kiwi ki chnat sorkar kiwa sah ha Them Iewmawlong. Katkam i ong u montri, kani ka kaam toh wow pyntikna ya kiwa toh hok wa kiwa wan sah tooh.
Discussion about this post