Khliehriat: Ka Anti-terrorism Day ynne da sakhi ya ka ha ka Conference Room ka yung krehkaam u Deputy Commissioner, East Jaiñtia Hills District, Khliehriat heiwa u DC ka District u F.M. Dopth, da man u kam u kongsan hei emlang u S.S Syiemlieh, Additional Deputy Commissioner ka District u S. Paswet, General Manager DCIC, u P. Nongtdu, Principal ka Jaiñtia Eastern College, u Gilbert A.L Marshilllong, Deputy Superintendent of Police, wa kiwi kiwi.
U S.S. Syiemlieh hawa e yei klam da khana u ya ka parom wa yatoh wa kani ka sngi kawa man ka lyngkhooh sngi yap yong u Rajiv Gandhi uwa jooh man kam u montri rangbahdooh warim ka ri deiwa khana leh ya ki thong wa da sakhi ya kani ka sngi wow wanrah yei chongsuk chongsaiñ.
Neiliang u S. Paswet da kyntu u ya ki paidbah wow thooh ki laad ki luti wow wanrah yei chongsuk chongsaiñ neibhah ki khynroo khyllood man ki ka mynried yong ka ri waroh kawi deiwa ong leh wa emkaam wow kreh chirup wow pyndooh ya ki kaam kieñ suloi.
U P. Nongtdu da ong u wa katni i chitom wa khroo dooh wa chem toh ka kaam ki seiñ kieñ suloi iwa wanrah yei tieñsar ha i pyrkhat pyrdaiñ ki bru heiwa da dooh ya ki hajar tylli ki mynsien. Da ong u leh wa kani ka sngi toh u man ko ka sngi wow pynyoo yei yatylli wow wanrah yei chongsuk wa i roi i paar.
Kam u kongsan u Dopth da ong u wa ka kaam ki seiñ kieñ suloi toh iwa da pynthut ya i waroh deiwa kyntu wa kam ki bru ha ka imlang sahlang ekaam wow wanrah yei chongsuk wa i mynsien wa chngaaiñ ha waroh nadooh na yung hadooh ha chnong wa ka District.
Da pynsñiaw u leh ya i wym yoh khih ki khynroo iwa pynbor ya ki wow leh ya ki kaam wa pyrchah aiñ deiwa kyntu wa ka emkaam wow wanrah yei kylla pyn na ki bru samen hi. Da pynkut u yei klam deiwa ong wa emkaam wow yaleh u ngait ha u Blai wei wow ekti ha kti yong oo neibhah oo man u uwa khlieh dooh wow wanrah yei kylla.
Ha kani ka sngi da klam leh ya ki kyntien kular wow yaleh pyrchah ya ki kaam kieñ suloi, wow wanrah yei chongsuk wa i yasñiawthooh para bru.
Neiliang u S.S Marwein ynne ka sngi won da e u ya ki kyntien khublei ha kani ka sngi.
Discussion about this post