Shillong: Ka liang pyrchah hapoh ka jylla ka Congress Party da ong ko wa man ko kawa husiar wa kawa paitbniah ya kiwa boon ki kaam wa da thmu ka sorkar pyrdi wa yahkhmat daka Bharatiya Janata Party (BJP) ka NDA.
U heh ka liang pyrchah u Dr. Mukul Sangma ynne ka sngi da ong u wa ka sorkar pyrdi da rai ko wow lai cha khmat wow pyndep yeiwa thmu ko kam wow pynkrehkaam yaka Citizenship Amendment Bill (CAB), kawa ym ye ki wow pyndep ha ka samoi wa da dep.
Katkam wa ong u Mukul, ka Party hap man ko kawa paitbniah yeiwa leh ka sorkar pyrdi yow lait u chah ktah ki paidbah ka jylla wei da pynbaad u leh waka sorkar jylla em bynta lang ko ha ini i kaam deiwa ka leh da pyrchang ko da ki kattu katni ki kaam yow sñiawthooh kammon sñiaw ki paidbah.
U Mukul da ong chooh chooh u wa ka sorkar NDA da pyrchang ko wow pyndooh noh yaka Article 35 (A) haka jylla Jammu and Kashmir, iwa man leh kam chibynta wow pynkrehkaam ya i jooh hapoh ki jylla ka thaaiñ mihsngi.
Katkam wa ong u Mukul ka Article 35 (A) toh kawa pynkup bor ya ki jaitbru Kashmiri wow man ki kam ki tre thaw wa kiwi ki hok wa yatoh waka khayi pateiñ waka seiñ khih seiñ khan kawa sariem yaki hok wa da e ha Meghalaya hapoh ka Sixth Scheduled.
“Nga yootieñ O ya ini i leh ka sorkar wa yahkhmat daka BJP khamtam wa yatoh waka 35 (A) wei i pyrchang yong ki wow pyndooh noh ka ym toh u kehiñke yeini. Ki paidbah leh toh u chimkhia ki wei wow pyrkhat ki ya ini wei lada ieh hi eh, manda poi sa i bynta yong i daw pdiang hi eh ya ini khlem pyrchah neidaw wa da yoo wa da myllien kiwi,” da ong u Mukul deiwa pynrap wa kammon wow khang u thied thaw pyn hapoh ka ri.
Discussion about this post