I kajia ha Them Iew Mawlong ym toh yaka thaw toh du wow tipmit ya kiwa em hok wow sah yow kyrriah noh ki: Prestone

Shillong: U symbood montri rangbah uwa man leh u Chairman ka High Level Committee (HLC), u Prestone Tynsong da ong u wa ka sorkar ka chimkhia bha ko hawa yatoh wow kyrriah ya ki bru wa sah ha Them Iew Mawlong namo ka Sweeper’s Lane, hanlada em boon ki eh.

Heiyatoh wa i dawa ka Harijan Panchayat Committee wow pyndam noh yaka Notice wa da phah da ka SMB cha kiwa chong chnong ha Them Metor hapoh 7 sngi, neiliang u Tynsong da ong wa ym pu yoh yutip u hajrong ini, tangwa daw yaklam u waka chnat aiñ ya kani ka kaam neibhah wa dang em ko haka yung bichaar ka jylla.

“I thmu ka sorkar katni toh du wow kwah u tip che ya kiwa em hok wow sah ha kani ka thaw yow tip u pynbiang thaw sah yaki kawa ym ya haap de wow sah katni ha kani ka thaw,” da ong u Tynsong.

Hawa kyntait won ki bru wa sah ha kani ka thaw wow pyntip cha ka sorkar, u Tynsong da kylli u deiwa ong, “Iyi i eh kini ki bru wow e pyrtuid? Ini mut wa em iyi iyi chadien. Ka sorkar u lai ko chakhmat katkam ka aiñ yow pynbait syndon ya kani ka kaam.”

Related posts

U yaleh wow wanrah da ka Direct Funding na Delhi cha JHADC: Manbha Lyngdoh

February 4, 2025

Lada jop O, pynyoo wa jop ki kup chiliang sem chiliang, ki warep wa kiwa mylla sngi: Rikut Parien

February 4, 2025

Heiyatoh won ye wym ye ka u pynbait ka sorkar lyngba ka HLC ya kani ka kaam kawa da lai cha khamt kattu la chi snem, neiliang u symbood montri rangbah da ong u wa kani ka kaam dang em ko haka High Court wei lada ym em ini ka kaam da toh wow pyndep noh katni.

“Waroh em ki ka hok wow lai cha ka yung bichaar, wei ka sorkar leh hap ko wow e yaka rai wow rah hakhmat ka yung bichaar yow yoh ya i bichaar,” da ong u.

Heiyatoh won wa i wym lai ka sorkar cha ka Civil Court, u Tyngsong da ong u wa ini ym toh wa kajia ya ka thaw ka bhaw wei katkam ka yasoi soskular hapyrdi ka Shillong Municipal Board (SMB) wa u Syiem ka Hima Mylliem ha u snem 1954 da klam che wa da e du wow sah ki wakreh.

“I ym yaklam i yaka thaw neibhah haka soskular 1954 da klam che wa yaka thaw toh yong ka SMB, wei kitu ki bru wa sah ha katai ka thaw leh ki tip ki ya kani, i katni kwah bait i wow tipmit du ya kiwa kreh neibhah ka thaw ym man de ko kawa hoi u sah.” ong u Tynsong.

Also Read: Lai biah Notice ka Municipal yow phah wan pynsakhiat ya kiwa sah ha Them Iewmawlong