Jowai: Ka Mawryngkneng Cultural & Sports Club da wai pyrda ko yaka 5th Mawryngkneng Invitation Knockout Football Tournament 2019 wa ya ka Mawryngkneng Super Cup 2019 ha ka 5 tarik uni u bnai.
Ha kani ka sngi, ka yalehke kawa nyngkong yong ka Knockout Tournament hapyrdi ka Iewrynghep F.C. kawa na ka thaaiñ Mawkynrew pyrchah ya ka Iaipyrshang F.C. kawa na Shillong man ko kawa yoosuk bha heiwa pyn ar liang da yoh ki u thap mar le kool.
Ka Iewrynghep da yoh ko wow pynhih jar lyngba u B. Mynsong haka minit wa 6 mar ya sdang ka yalehke wei yaka kool wa ar da thap da u I. Mukhim ha ka minit kawa 25 yong ka kylla step.
Mar ya sdang ka kylla miet, ka Iaipyrshang da yoh ko wow thap kool haka minit wa 44 lyngba u R. Kharlukhi wa ha ka minit wa 65 lyngba u S. Pyngrope. Katwa ka Iewrynghep da yoh ko wow pyntam biang lyngba ka kool yong u L. Mynsong ha ka mint kawa 71. Ka Iaipyrshang da yaleh dohyap ko wei khatdooh khatwai da yoh ko u thap kool wa yoosuk bha lyngba u S. Pyngrope ha ka minit kawa khadooh. Kamtæ yow jied ya kiwa jop da pynman daka yachut Tie-breaker heiwa ka Iaipyrshang da jop ko da 4-3.
Hawa pait won cha ka yalehke yong ka Mawryngkneng Super Cup, ka Iaiminot kawa man kawa jop ha u snem 2018 da rem ko haka Thadnongtyrkhang Nonghali da 1-2 heiwa ka Nonghali da yoh ko wow thap ya ki artylli ki kool lyngba u W. Nongrum ha ka minit kawa 13 wa u P. Mynsong ha ka minit wa 55 katwa ka chi kool ka Iaiminot da wan ko lyngba u R. Sari ha ka minit ba 65.
Ya kani ka Mawryngkneng Super Cup da chah wow ya chimbynta du ya ki liang kiwa chimbynta ha ka Mawryngkneng Greater Football League 1st Division wa 2nd Division.
Discussion about this post