Jowai : Ka lympung yaleh bol yong ka 6th U Kiang Nangbah Memorial Inter Office Football Tournament da sdang nadooh ka 19 tarik uni u bnai wada pynman da ka Sports Committee yong ka Meghalaya State Government Employees Federation, JH Unit ha madan Kiang Nangbah Stadium, Jowai.
Ha ka yakhun wa man ynne ka sngi hapyrdi ka Police XI wa ka Medical XI da man ko kawa jem chiliang heiwa ka Medical XI da chah pynrem ko hadooh 9-1.
Ya kini ki goal da thap da thap da ka Police XI lyngba u Lami Passah ha ka minit wa 2, u Teibor Siangshai ha ka minit wa 6, u Niwan-O Gatphoh ha ka minit wa 23, u Meker Suting ha ka minit wa 30, u Lami Passah da yoh hat trick u deiwa thap u ha ki minit wa 42, 51 wa 53, u Meker Suting da thap biang u ha ka minit wa 56 wei da thap khaddooh da u Reginal Shadap ha ka minit wa 58.
Katwa neiliang ka Medical XI da yoh ko u thap du chi goal lyngba u Pynskhem Garod ha ka minit wa 44.
Discussion about this post