Ka NPP toh kawa chna kyrpang neibynta ka Northeast: Conrad

Shillong: Ka National People’s Party ynnin ka 8 tarik da pynman ko yaka yalang wa nyngkong yong ka Northeast Coordination Committee (NECC) ha Shillong yow pynkhlan ya i tre ka Party wei wow pynpoor yaka Party cha kiwi thaaiñ mihsngi wa ki yurim waka Party yeiñ ko.

Yaka NPP-NECC da khlieh da u Dr. D.D Lapang, uwa da ong wa kani ka yalang daw wanrah ko yaka rta wa thymme yaka Party.

“Kani ka yachem lang man ko kawa emkaam bha neidaw ka Party daw chim ko boon ki rai yow jied ya ki luti wow lai ko yow poi cha waroh ki kdong ki chmiang ka thaaiñ mihsngi,” da ong u Lapang, hawa e u ya ki ktien waiphang haka yalang.

Da ong leh wa i tipmit yaka NPP kam ka “National Party” da ka Election Commission of India daw wai ko boon ki luti haki kaam khamtam hadien waka NPP da man ko ka Party wa nyngkong naka Northeast wow yoh yei kyrdan National Party.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

“Kattu da man ko i kamram yong waroh wow rah yaka Party chakhmat yow poi ko ha kylleiñ ka ri deiwa ym mylliñ hi leh ya ka yurim wow pynku yaka thaaiñ Northeast,” da ong chooh chooh u Lapang.

Ha kani ka sngi da emlang kiwa yahkhmat kiwa boon ki jylla kam na Assam, Arunachal Pradesh, Nagaland, Manipur, Meghalaya wa Mizoram wa kynthup ya u Meghalaya Chief Minister Conrad K. Sangma, Deputy Chief Minister ka Manipur Joykumar Singh wa ki montri ka NPP ka sorkar Manipur, Legislative Party Leader ka Arunachal Pradesh u Mutchu Mithi wa kiwi kiwi de.

Ha kani ka sngi da pynkup burom u Conrad yaka MP ka Tura ka Agatha K. Sangma, CLP Leader na Arunachal u Mutchu Mithi wa yaka MLA thymme ka Meghalaya, kawa jop yaka Selsella By-election ka Ferlin C. A. Sangma.

Da kynmoo warom leh ya uwa yahkhmat ka NPP na Arunachal Pradesh u Tirong Aboh uwa da chah siat yap deilang wa kiwi.

U Conrad K. Sangma hei klam yong oo da ong u wa i tipmit yaka NPP kam ka National Party toh u moomer neibynta ka thaaiñ mihsngi waroh kawi wei da e khublei u ya waroh kiwa emkti wow krehchitom khlem chong ngiah ha waroh kawi ka thaaiñ deiwa kynmoo u leh ya u Purno Sangma uwa da seiñ ya kani ka Party wa ki yurim wa yeiñ u.

Da ong u leh wa da yoh yaka kyrdan “National Party” toh iwa da jia da i krehlang waroh, “Ym toh wa chna sorkar i ha Meghalaya, ym toh wa embynta i waka sorkar ha Manipur, ym toh i em ar ngut ki MLA ha Nagaland, da yoh i ya kani ka kyrdan deiwa embynta lang ha waroh ki jylla nadooh kiwa jop Election wa kiwa rem Election wei ini man ko ka nongmuna wa ye u poi cha kawon kawon ka thong lada ya krehlang.”

“Ka NPP ym toh du ka Party kawa na Northeast, ka NPP toh kawa chna kyrpang yaka Northeast yow ye u pynman kaam ya waroh i angnood ki paidbah,” da ong chooh chooh u Conrad.