Shillong: U Banteidor Lyngdoh, MLA ka Mawkynrew Constituency, uwa man leh u montri ha ka sorkar Meghalaya Democratic Alliance (MDA) uwa pait ya ka chnat Agriculture, Sports and Youth Affairs wa kiwi ki chnat, ynnin ka sngi deilang wa ki le tylli ki chnong ka Mawsir, Mawdulop wa Ksanryngi da pynman ki yaka yalang wow yaklam hajrong i eh kiwa kini ki le chnong da chem ki khamtam hawa yatoh wa i angnood yong ki wow yoh noh ya ka sarok rong ka wow pynyabi ya kini ki le chnong.
Kini ki le chnong ha i yahkhmat ki sordar chnong kiwa da chna daka Village Development Committee deiwa ya krehlang wa u MLA ka thaaiñ da pynman ki yaka yalang ha ka chnong Ksanryngi heiwa da khut lang ya ki sahep ki chnat wahpær waphær nadooh u Block Development Officer ka Mawkynrew C &RD Block, u LT Tariang, kamjooh ka chnat PHE, Border Area Department, PWD (Roads), Veterinary and Animal Husbandry, Agriculture wa Horticulture wa kiwi ha i emlang ki paidbah chong chong kine ki le chnong.
Kini ki le chnong ki da pynsñiaw ki wa da boon snem da yooluti wei angnood ki ya u sarok rong wow pynyabi ya kini ki le chnong ka Mawsir, Mawdulop wa Ksanryngi. Kani ka sarok da chah ieh beiñ khlem em wa pait yaka da ki phaw phaw snem. “I da kyruiñ i cha kiwa mihkhmat kiwa da dep tangwa ym em man kaam wei i da thooh laad i lyngba ki chnat sorkar tangwa ym em poi cheiwon cheiwon i thmu yong i,” da ong kiwa yahkhmat chnong ha kani ka yalang.
Kani ka surok kawa pynyabi ya kini ki le chnong jrong ko kamwa 4-5 km wei i sih uni u sarok khyndaw da joor bha ko ha ki por slap. “Ha ki por tlang i ya mih paidbah i wow pynchna deiwa theh moo theh chyiap ha ki thlu kani ka sarok tangwa hadooh katwon donhi u ye u leh neibhah manda wan u slap da sih biang ko,” da ong ki sordar na kini ki le chnong kiwa da kyntu ya u MLA wa ki sahep sorkar wow leh ki iyi iyi neibynta kani ka sarok kawa jooh yoh yarap naka chnat Border Area kham nachwa wei da pynbha lyngba ka Scheme MGNREGS da ki VEC yong kini ki chnong.
U Banteidor Lyngdoh, hawa klam haka yalang da ong u wa kani toh ka sien wa nyngkong wa yoh u yooh kjat ha ka chnong Ksanryngi wei da pynsñiaw u yei sñiawkmen wow poi ha kani ka sngi wow yachem ya ki paidbah kini ki le chnong. “Nga toh u bru uwa em yumut du wow kyntu ya ka roi ka paar ki paidbah wei da yachem i kamni khnang wa i yoh u pynlai yaka kaam chakhmat heiyatoh wa waroh i eh yong phi ki paidbah chong chnong,” da ong u Banteidor.
“Nga ym kwah O wow put turoi ya ki kaam kiwa nga da leh næ kiwa nga thmu O wow leh neibynta ki paidbah, kwah O yaka krehlang wa nga kamjooh ki sahep sorkar yow pynlai i ya kani ka kaam chakhmat. Nga kyntu O ya phi wow man kiwa nehchah wei daw pynbait wa ki sahep PWD wow pynpsiah Scheme noh ya uni u sarok wei nga kular O wow yaleh katwa ye da i kaam”, da ong u Banteidor uwa da pynrap leh wa kawon kawon ka chnong ha ka Constituency lada boonbru ne duna bru tangwa kawa yatoh wow kreh yaka kaam toh u kreh bait.
Discussion about this post