Jowai: Ki dkhot ka Southern Border Youth Welfare Association (SBYWA), hadien wa yoh ujor wa ka yutip wa bniah na ki paidbah wa ka Sub-Center kawa em ha ka chnong Lama kawa haap hapoh ka East Jaiñtia Hills District, kawa ym jooh em ki wakreh nadooh ki Nurse wa kiwa e dawai, ka SBYWA ha kani ka tayaw kawa da dep da lai hiar ko cha ka chnong Lama kawa jngai kamwa 45 Km na Rymbai kawa man leh ka chnong khappood wa ka Bangladesh.
Ha i lai sylli kiwa yahkhmat ka SBYWA kiwa kynthup ya u President u Skhembor Shadap, General Secretary u Namphrangmi Talang, u Eladmi Suchen wa ki tre chnong da chem sakhiat ki wa kani ka Sub-Center ym em ko kiwa kreh wei man ko kawa da khang khyrdep wei kani ka Sub-Center man ko kawa da jæd da pra wa kawa tngit.
U E. Suchen uwa man u tre chnong da ong wa ki bru yong ka chnong Lama, ym em yoh myntoi ki iyi iyi leh na kani ka Sub-Center, heiwa ki bru kiwa kjut wa chitom malu mala leh hap ki wow lai chim dawai nadooh na Bataw PHC, Rymbai, Khliehriat wei chadooh Jowai kawa ktah ya ki haka bai lai bai wan wa ya i por wa i bor yong ki du neidaw wa ym em wakreh kani ka Sub-Center.
Neiliang ka SBYWA da dawa ko naka sorkar wa naka chnat ka chait ka khiah wow pynbiang wakreh ha kani ka Sub-Center, wow wan tikna ki leh cha kani ka thaw e dawai neibynta i yoh myntoi wa i yarap ki paidbah kani ka chnong khamtam ya kiwa dooh wa rangli.
Discussion about this post