Hadien wa chah khang 33 tylli ki dukan ha Nongmensong ha ka KHADC, lai yachem u Hek ya u Paul

Shillong: U MLA ka Pynthorumkhrah Constituency uwa man leh u montri ka sorkar jylla, u AL Hek da lai yachem u ya u Executive Member ka KHADC wa pait ya ka kaam khayi, u Paul Lyngdoh wow pynsñiaw yei mynsien wa khia hadien wa da khang noh ka KHADC ya ki 33 tylli ki dukan ha Nongmensong neidaw wym em Trading Licence ki.

U Hek da e u leh ya ka dorkhat ha u Paul wa ong wa ini i khang syndet ka KHADC ya ki dukan ktah bha i ya ki baar jylla kiwa da sah slem ha kani ka thaw wei kiwa da seiñ khih ha kani ka thaw, deiwa kyntu ya u Paul wow elaad wow wai biang kini ki dukan kamwa jooh.

Neiliang u Hek da ong u wa ini i chah khang kini ki dukan man i iwa sñiawsih bha neibhah ka KHADC da khang ko ya ki dukan yong ki bru kiwa da chong da sah slem kiwa man tre jylla nadooh nachwa katwa kiwi won kiwa dang wan wot da yoh ki ya ki Licence wei kini ym em chah khang ki.

Da ong u wa da kyntu u ya u EM wow pait bniah u wa ini i khang ymktah ware ko ya ki baar jylla kiwa da man tre chnong wei kiwa da kreh ha kani ka jylla, deiwa pynrap wa kiwon kiwon ki bru kiwa man tre heini ym chah ktah ka kamai ki.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Chooh chooh da ong u wa kini ki bru kiwa da chah khang dukan toh kiwa da yoh trading licence nadooh nachwa wei em ki kot ki sla kiwa nadooh u snem 1997-98.

Da ong u leh wa neiliang u Paul da phah pynbiang u ya ki kot ki sla yong kini ki bru hapoh chi tayaw wei daw bichaar biang ya ki chwa wow chim rai ka KHADC.

Neiliang won u Paul Lyngdoh da ong u wa iyi iwa da leh ka KHADC toh katkam ka aiñ Trading by Non Tribal Regulation, 1954 ya kawa da chna lyngba ka Sixth Scheduled deiwa pynrap wa ini i pynsñiaw u MLA ka Council leh da e por ko ya ki wow pynbiang kot ki hapoh chi tayaw.

Da ong u leh wa kini ki bru hanlada man ki kwia da sah slem tangwa ym em yoh NOC ki na ka dorbar chnong wow chong dukan wei da khang ya ki dukan neidaw wa ym em Trading License ki wei kiwa em leh toh kiwa da rim kiwa khlem pynthymme de.

Da ong u leh wa katkam ka aiñ ym emkaam wow pyntip chwa namo wow epor tangwa ka KHADC em ko ka bor wow kynreh ya ki kot ki sla ha iwon iwon i por, wei hajrong i chah pynbaad wa ka Council da yachah chiliang ko, neiliang u Paul da ong u wa ka Council ymye ko kynreh heijooh i por ya waroh ki dukan tangwa i kynreh u pteiñ bait i wei em leh ki dukan kiwa dang hadien em ki ya ka NOC wa da pynthymme chisien ha ki le snem.

Chooh chooh da ong u wa ka KHADC daw pteiñ ko u khang ya kini ki dukan khamtam lada ymye ki wow pynbiang ya ki kot ki sla hapoh chi tayaw kamwa da e por.