Jowai: 146 ngut ki nongialehke Badminton na waroh ki district ka Meghalaya deilang wa ki 18 ngut ki nongpyllai da poi ha Jwai yow ia chim bynta haka 33rd State Badminton Championship 2015 kawa da sdang ynne ka sngi ha ka Khimusniang Indoor Sports Hall.
Kani toh ka sein wa ar wa wan kani ka State Championship ha Jowai ong u ma T. Laloo Joint Secretary ka West Jaintia District Badminton Association, ong u leh neiliang ka association u pyrchang ko u pynman ia kani ka tournament kawa lai beit wei ka wa sahkynmoo ia waroh ki wa wan chimbynta ha kini soo sngi daw wan.
Na ka West Jaintia hills da em 26 ngut kiwa mihkhmat ia ka West Jaintia Hills State Badminton Association, ki wow chimbynta ha ki kyrdan waphaer waphaer wei da em leh sa 34 ngut kiwa daw iakhun ha ka yakob yonglang (open category). Ki kyrdan wa em ha kani ka tournament toh ki rta 13 snem, 15 snem, 17 snem wa ki 19 snem. Ki nong iachimbynta ye ki u ialeh ha ki mar samen, mar arngut waka chynrang kynthai deilang (mixed doubles).
Na East Garo Hills da em 12 ngut wa wan, na West Garo Hills 6 ngut, South Garo Hills 5 ngut, South West Khasi Hills 16 ngut, Ri-Bhoi Badminton Association 21 ngut, East Jaintia Hills 12 ngut, West Khasi Hills 14 ngut, 20 ngut naka Young Talents Club katwa na East Khasi Hills 40 ngut.
Ia kani ka yakob da wai da u ma Thombor Shiwat u CEM ka JHADC dei wa emlang u Rajesh Kamal Nongbet Secretary Meghalaya State Badminton Association. Ha chwa u sdang da em chwa ka yalang wai wa da pynlai da u ma J.M. Pohsngap u President ka West Jaintia District Badminton Association, Jowai.
Kani ka tournament u kut ko ha ka 5 tarik uni u bnai.
Discussion about this post