Jowai: Kam ka dak i sñiawngooh sñiaw burom wei heijooh i por wow pynsñiaw yei sihlet ya u H. Shangpliang, District Sport Officer (DSO) ka WJHD uwa da e i chakri yaki paaid ka ri-loom Jaiñtia la kamwa 16 snem hadooh ka kynti wow chong ngiah u nei khih i kreh kam u chakri sorkar, neiliang ka West Jaiñtia District Sport Association (WJDSA) ha kani ka 26 tarik da chim ko ka bynta wow leh burom ya oo ha yung krehkaam yong ka ha Indoor Stadium Jowai.
Kam ka dak i sñiawngooh, ka WJDSA da pynkup ko ha o yaka ryndia tlem kamjooh da e kti ko yaka memento wa kiwi ki e sñiawbha, nalor wa da pynsñiaw ki leh ya kiwa boon ki dak kti wa oo da leh u haki 16 snem wada lai chadien neibynta wow kyntu kynrong yei kaam Sport hapoh ka ri-loom Jaiñtia.
Neiliang ki dkhot ka Association heiwi i liang pynsñiaw ki yei sñiawsih wow dooh noh ya oo, weiwa ini man leh i dooh yaka District hi waroh kawi, tangwa han kattæ leh kamwa ka por batai ko wa uwi pa uwi uwa kreh sorkar hap u wow chong ngiah mynda toh por, chim ki ka kabu wow e khublei wow pyneh bok eh nasib ya oo wow yoh u yei chait i nang haki sngi wa chakhmat.
Neiliang u H. Shangpliang won hawa e yei klam pynsñiaw u ya i sñiawngooh yaka WJDSA wa da chim ko ya kani ka bynta wa khroo wei da ong haroh u, “Hei manbru boon i bakla i duna i wym ya sñiawthooh yumut tangwa i yamap kylliang toh iwa emkaam wei lyngba kam kini i ya takhooh yarap ko wow kyntu kynrong yei kaam”.
Kamtæ oo leh chim u ka laad ka kabu wow paanmap na waroh kiwa jooh ya takhooh kam u lada jia em i bakla i duna u haki snem wa da lai.
Da ong haroh u wa hanla da chong ngiah u leh, i mynsien i sñiaw yong oo won u em i cheini hi cha ri-loom Jaiñtia neibhah da sñiawjooh sñiawjan u. Heijooh i por tyrwa u wa lada sñiaw emkaam won ki i yarap na oo, smat u wow e yarap.
Yaka yalang leh burom da pynlai da u Working President WJDSA u EMH Passah, da yoh i klam na u General Secretary u Lamat O Laloo, i klam na u Secretary Indoor Dawan O Shullai, na u Basketball Secretary u M. Paswet, na u Treasurer u J. Paswet katwa i klam e khublei da yoh na u Joint secretary u K. Shylla.
Discussion about this post