New Delhi: u montri wa pait ya ka Ministry of Development of North Eastern Region (DoNER), u Dr. Jitendra Singh ynne da yachem u ya ki MP ka thaaiñ mihsngi kawa tip leh kam ka North East MPs Forum kiwa kynthup ya ki MP ka Lok Sabha wa Rajya Sabha, ha nongbah New Delhi.
I thmu wow pynman ya kani ka yalang toh ka wow pynche ya ki MP ya ki Scheme wa ki thong krehkaam ka sorkar pyrdi neibynta ka thaaiñ heiwa da emlang u Secretary (DoNER) u Dr. Inder Jit Singh, u Secretary (North Eastern Council) u Ram Muivah wa kiwi kiwi.
U Dr. Jitendra Singh da ong u wa ka DoNER man ko ka chnat ka sorkar pyrdi kawa da mang wow kreh du neibynta ka thaaiñ wei ha ki san snem wa da lai hapoh i yahkhmat u montri rangbah dooh ka ri, u Narendra Modi da chimkhia wow pynku ya ka thaaiñ.
Da ong u leh wa da pynsuk ya i rukom pynkhreh ya ki DPR khnang wow pyntikna wa daw ye wow pynkrehkaam hok ya ki Scheme ha ka thaaiñ yow lait na i slem wow pyndep ya ki kreh. Da ong u leh wa ki montri rangbah wa ki Resident Commissioner wa em ha Delhi da kyrpaad ya ki wow yakreh ki chirup wa ka DoNER Ministry wow booddien ya ki kreh ha jar jiar ki jylla yong ki.
Chooh chooh da ong u wa ka bhah poisa neibynta ki kaam pynroi ha ka thaaiñ da yaklam yeini wa ka Finance Ministry heiwa nachwa da em ka yabhah poisa wa 90:10 hapoh ka NLCPR, iwa mut 90% ka poisa da e da ka sorkar pyrdi katwa 10% won na ka jylla tangwa ka sorkar pyrdi lyngba ka Union Cabinet da mynjur ko ya ka North East Special Infrastructure Development Scheme (NESIDS) heiwa waroh 100% ka poisa u e noh da ka sorkar pyrdi. Ini daw yarap i ya ka yarong poisa yong ki sorkar jylla.
Discussion about this post