Jowai: Ynne ka 29 Naiynru u man ko ka sngi wa sah kynmoo yanom ya ki khon ka Seiñraij Niamtre Ummulong heiwa ki khon ka Seiñraij da yoh ki wow wai ya u Khnap Thang-bru kawa da chna hei lut iwa kynjoh kamwa T. 25 lak ha Phang Samynting, Ummulong.
Ha kani ka sngi u MLA ka thaaiñ uwa man leh u montri ka sorkar jylla, u Sniawbhalang Dhar da man u kam u kongsan, u CEM ka JHADC u Thombor Shiwat da man u kam u symbood kongsan hei emlang u MLA ka 2 Jowai u Wailadmiki Shylla, ki MDC ka JHADC wa kiwi kiwi.
Ya ka yalang ynne ka sngi da pynlai da u Mul Passah uwa man kam u President ka Seiñraij Ummulong, wei da yoh ya i kyntien lamphrang na u Embhahlang Rymbai uwa man kam u General Secretary.
Neiliang u President ka Seiñraij Jowai, u OR Challam hawa e yei klam da khana u ya ka parom yong kani ka Khnap Thang-bru wei kammon wa da chna da pynwandur ya ka da u (T) Kambel Shullai wei kammon wa ka Seiñraij Jowai da chimkhia ko wow yarap wow ebor wow chna ya ka Khnap wei da khana u leh wa katni da em 54 tylli kini ki thaw pyndep ya ka niam yap ha kylleiñ ka jylla.
Kam u symbood kongsan, u Thombor Shiwat da e yaroh u ya ka Seiñraij Jowai kawa da wanrah ya kani lyngba u Scientist (Kambel Shullai) hanlada ym em yoh u yei puræ puthi wow pynjanai yeini i rukom chemphang yong oo heiwa da khana u leh ya ka parom wa da chah chondur u da ka camera kot-rben wa da chna pynwandur da u (T) Kambel Shullai.
Chooh chooh da ong u wa em ki thaw kiwa em ka Khnap Thang-bru heiwa kiwa da heh da tymmen i rta kyntait ki wow pyndep ya ka niam yap ha kani ka Khnap Tangbru deiwa kyntu ya ka Seiñraij wow pynsñiawthooh ki yeini i sñiaw waroh.
Neiliang u kongsan ha kani ka sngi, u Sniawbhalang Dhar da ong u wa i daw wa ye wow chna namo wow pynwandur ya kani ka thaw (Khnap Thang-bru) toh deiwa yoh yei kyrchaan na yung na sem, katwa kamtæ da ong u wa ha ka yung ka sem da emkaam wow man ko kawa sñiawthooh wei kawa yakyrchaan iwi ya iwi.
Chooh chooh da ong u wa emkaam wa i jhep wa mih na kani ka thaw ymtoh u lai u kai ki cha ka um ka wah wa em hajan kani ka thaw deiwa kyntu ya ki khynroo khyllood wow chimkhia ki yeini waroh.
Ha kani ka sngi da yoh leh yei klam na u waheh chnong ka Ummulong, u Leo Laloo; u Dolloi ka Elaka Jowai, u Puramon Kynjing; u MDC ka thaaiñ, u Jesse Suiam; u Wailadmiki Shylla wei ya ka yalang da pynchongkhia da i ngoohblai na u Knermiki Passah.
Ya ka yalang da pynkut da ki kyntien e khublei na u Rilangki Siangshai uwa man leh kam u General Secretary ka Seiñraij Ummulong.
Ha kani ka sngi da pynkup burom leh ya kiwa ha yung ha sem u (T) Kambel Shullai.
Ya kani ka Khnap Thang-bru da ye u wai hadien kamwa 7 snem wa da sdang chna ya ka wei ya ka poisa wa da pynlut neibynta ini toh iwa da e da u Sniawbhalang Dhar lyngba ka MLA Scheme, u MP ka Shilong, u Vincent H Pala, ki khon ka Seiñraij Ummulong, Seiñraij Jowai, wa kiwi kiwi ki bru samen.
Discussion about this post