Jowai: Ka sorkar pyrdi da wanrah ko yaka Motor Vehicles (Amendment) Bill ka wow pynkylla ya kani ka aiñ khamtam wow pynku ya ka daiñ kuna ya kiwa da tyngkheiñ ya kani ka aiñ wei da wanrah leh ya kani ka Bill hakhmat ka Union Cabinet haka 24 tarik uni u bnai wei daw wanrah yaka haka Lok Sabha yow yoh yei mynjur.
Ya kani ka Motor Vehicles (Amendment) Bill nyngkong da wanrah ha u snem 2016 wei da shkut ko haka Rajya Sabha. Kamtæ kani ka Bill da yap ko haka sorkar warim kawa man leh ka 16th Lok Sabha.
Deiwa wan ka sorkar wa thymme da wanrah thymme biang ya kani ka Bill ha kani ka kynti wei ki kyndon wa thymme man ki kamni ha wah.
Manda krehkaam kani ka Motor Vehicles (Amendment) Bill ka wow pynthymme yaka Motor Vehicles Act, 1988 kawa krehkaam katni da em ki daiñ kuna kiwa da ku 10 chah.
Ya kiwa yah kari deiwa muaid nachwa ka kuna man ko T. 2000, u ku noh ko cha T. 10,000.
Ya kiwa pyhær kari ka kuna u man ko T. 5000 heithaw ka T. 500. Ya kiwa yah kari khlem deiñ Seatbelt kamjooh kiwa ym sap Helmet u ko naka T. 100 chaka T. 1000.
Ya kiwa pynwit yei lai i wan ki Ambulance namo ki Emergency Services daw hap ki wow su T. 10,000.
Kiwa yah kari khlem Insurance hap su ki T. 2000.
Kiwa yah kari khlem License hap su ki T. 5000 wei lada pteiñ ki wow leh ya ini daw hap su ki T. 10,000.
Ki kari kamai wa kit palat pood hap su ki T. 20,000.
Lada yah kari da ki khynnah wa ym pu biang rta wa 18 snem kamjooh kiwa ym em License, ka aiñ thymme daw pynchitom ko ya ki bei ki pa ki khynnah kamjooh kiwa kitkhlieh ya ki wei hap su ki ka kuna wa T. 25,000 wei ye ki leh wow chah pyndam ka License yong ki. Katwa ya u khynnah won daw chah bichaar u hapoh ka Juvenile Justice Act.
Ya ki Company kamai kari wa pynemkaam da ki App kam ka Ola wa Uber leh da klam chaphang yong ki hapoh kani ka Bill wei lada tyngkheiñ ki yaka aiñ daw pynchitom yaki leh.
Discussion about this post