Khliehriat: Ka yung krehkaam u Deputy Commissioner, East Jaintia Hills District, u District Sports Officer, East Jaintia Hills District waka Officers Club, East Jaintia Hills District ynne da pynkup burom ki ya kiwa jop haka State Level Champion ka U-12 Football Tournament Girl’s Category wa kiwa yoh takma haka State Level Inter School Athletic Meet 2019.
U F.M. Dopth, Deputy Commissioner, East Jaintia Hills District, Khliehriat da man u kam u kongsan hei emlang u R. Nongtdu, General Secretary ka Officers Club, East Jaintia Hills District wa u K. Passah, District Sports Officer, East Jaintia Hills District.
U kongsan hei klam yong oo da ong u wa ini i poi kiwa yalehke ka District chakhmat man ko kam wow pynchlur yow kreh chitom chooh chooh yow poi rap chakhmat haka kaam yalehke. Kamwa man katni ka yalehke Sport man ko leh kam ka laad kamai ja kpoh heiwa hapoh ka ri katni da yaleh bha wow pynku yaka Sport wei kamjooh hapoh ka District yow ku ki ha ki jar jiar ki jait yalehke yow poi ki cha ki kyrdan wa heh.
Da kyntu u leh ya kiwa yalehke wow ap ki yeiwa sikai ki Coach yow man ki kiwa pliah yow tip ki leh ya ki buit wa thymme. Da pynkynmoo u leh wa emkaam wa ka puræ puthi kamjooh ki Sports wow lai ki deilang neidaw wa uwon uwon uwa yalehke emkaam u yaka stat ka tip ka wow yarap yaki wow man ki kiwa yalehke wa paka. Da klam u leh chaphang ki manbei manpa kiwa e yei pynchlur wa i kyrchaan ya ki khon yong ki iwa man iwa emkaam dooh wow pynku yei sap ki khynnah.
Chooh chooh da ong u leh wa ka yung krehkaam yong oo wa u District Sports Officer u e ki ya i yarap yow pynku yaka Sport hapoh ka District.
Ha chwa ini, u R. Nongtdu, General Secretary Officers Club, East Jaintia Hills District hei klam yong oo da e khublei u ya ki dkhot ka U-12 Girls Football Team ka District yeiwa leh bha ki kamjooh kiwi kiwa yalehke ha ki jar jiar ki jait yalehke kiwa jop haka State Level Inter School Sports Meet 2019. Da ong u leh wa ka Sport man ko kawa emkaam bha ha i im yong i wei toh u chimkhia yaka yow pynpliah ya i sap wa da em chwa ha ki nadooh wa da kha. Da baan joor u leh yeiwa emkaam wow yait ya i kiad, u sikret wei wow baam da ki baam wa pynchait pynkhiah yow lait u sepai ki kam ki bru Sport. Da pynkynmoo u leh yeiwa emkaam i yakrehlang wow sñiawthooh uwi ya uwi manda yalehke yow poi cha ka thong.
U K. Passah, District Sports Officer, won hei klam yong oo da yaroh u ya waroh kiwa yalehke kamjooh ya ki Coach kiwa da wanrah burom yaka District. Da kyntu u ya kiwa yalehke wow kreh chitom ki haka puræ puthi kamjooh haka Sport yow yoh ki ki laad wow yoh kreh haka chnat pulit, ki kaam chipai kamjooh ha ki chnat krehkaam ka sorkar waphær waphær.
Hadien da saam leh da ka song poisa ya kiwa yalehke kamjooh yaka Under-12 Girls Football Team wa yaki Coach kiwa da leh bhah haka State Level Sports Meet.
Discussion about this post