Shillong: Ka Khasi Hills Autonomous District Council (KHADC) da kyntu ko wow pynuiñ chwa ya ka Land Bill wa da mynjur da ka Council khnang wow yoh u pait bniah biang ya ka ya ki duna kiwa da pynman ya u Lat ka jylla wym pu e u ya ka muhor hadooh katni hadien wa ya kani ka Bill ka KHADC da dep wow mynjur nadooh u snem 2014.
Na i liang u Chief Executive Member, u Teinwell Dkhar wa u Dy. CEM, u Pyniaid Sing Syiem deilang wa 4 ngut ki Executive Member, ynnin ka sngi da yachem ki wa u symbood montri rangbah, u Prestone Tynsong neibynta wow yaklam yillu yow phah biang waroh ki Bill ka KHADC kiwa dang sahteiñ wa kynthup ya ka Land Bill.
Hawa yaklam wa ki laad pathai khubor, u Teinwell Dkhar da ong u wa hajrong ki Bill wa da dep wow mynjur da ka KHADC khamtam hajrong ka Land Bill kawa emkaam wow yoh noh ya ka muhor na u Lat neibhah katni da sahteiñ ko kattu la 5 snem.
“Neiliang u Dy. CM da kular u wow pynuiñ biang ya ka Land Bill cha ka Council, deilang wa kiwa emkaam wow pynbiang, khnang wa ka KHADC u yoh ko yei mynjur,” da ong u Teinwell.
U CEM da pyntip u leh wa neiliang ka KHADC da yaklam ko leh hajrong kiwi kiwi ki Bill wa da mynjur da ka KHADC kiwa da sahteiñ khlem yoh ya ka muhor wei kiwa da chah pynuiñ noh.
Na i liang u EM wa pait ya ka chnat Land, u Titosstarwell Chyne da pyntip u wa hadooh katni em hadooh 39 tylli ki Bill wa da mynjur da ka KHADC kiwa khlem yoh ya ka muhor na u Lat ka jylla.
“Napyrdi kini ki Bill, i sñiaw i wa ka Land Bill toh kawa emkaam bha neidaw wa kamwa man katni, i jooh yaklam i barabor wa i toh ki tre khyndaw wei ka KHADC toh kawa neibynta wo yada ya ka khyndaw ka chyiap, tangwa manda poi won ha ka aiñ ym ye i,” da ong u EM deiwa pynrap wa kamwa man katni, ka KHADC ka em bor ko du wow booh ya ki Land Record katwa ya ki thaw won, ka Council ym ye ko wow Register.
“Lada yoh i ya ka yong i hi ka aiñ, i mantre yaka khyndaw yong i u neh ko,” da ong chooh chooh.
Ha kawi won ka liang, u Titos da pyntip u wa ha kani ka yachem da yaklam leh ya boon tylli ki kaam wa kynthup i pyllait ya ki scheme wa ki Fund cha ka Council, wei kamjooh da yaklam bniah leh ya i pynmih hukum ka sorkar lyngba ki bor pynlai District wow phah sangeh noh ya waroh ki tih moo wow chyiap kawa da ktah ko ya kiwa chong chnong ki wakreh ya kitai ki kaam.
“Kiwa tih moo wa u chyiap du neibynta wow chna yung chna sem, ki chah ktah ki na kani ka hukum, ki ym toh kiwa tih moo kiwa heh wow pynemkaam da ki pooh chiloom, i da yaklam bha i ya kani ka kaam wei neiliang ka sorkar nalor wa da pynmih ko ya ka Meghalaya Minor Minerals Rules, 2016 daw pynyinsur chooh chooh ko ya ki kyndon krehkaam, heijooh i por ka wym ktah ya ka mariang na kani ka tih moo tih chyiap,” da ong u.
Discussion about this post