Shillong: Ki dkhot ka liangpyrchah ha ka yung dorbar ka KHADC da dawa ki na ka Executive Committee wa ym toh u pyllai yumut du ya ka yaw dai yonglang ha Iewduh wei emkaam wow pait lang leh ya ka yaw cha ki thaw nongkyndong kiwa haap hapoh u pood u ang ka KHADC heiwa ki warep da chah ksih dor ki ha ki mahajon, chah ah kilo wa kiwi kiwi ki bynta.
U MDC ka Mawhati u Charles Marngar wei kamjooh u MDC ka Mawkyrwat u Carnes Sohshang wa u Ronnie V Lyngdoh na ka Congress, ki da rah ki ya kani ka kaam deiwa booh ya ki phang kylli wa chah ah kilo ki warep ha yaw dailang ha Iewduh.
U Charles da ong u wa em ki yaw cha nongkyndong heiwa ki warep chah ksih dor ki ha kiwa thied wei ka Council toh u pait ko kamjooh ya ini, u MDC ka Mawkyrwat da ong wa em ki bru kiwa da wan nadooh Assam kiwa da thied piskot cha ka thaaiñ Mawkyrwat wei kam ya kini ki bru da emkaam wa ka District Council wow pyntikna wa ki toh u lai katkam ka aiñ khayi næ wow yoh ya ka Trading License.
Katwa u MDC ka Mylliem u Ronnie V Lyngdoh da ong u wa ka District Council toh u khut lang ko ya ka chnat Legal Metrology ka sorkar wa em ha ka Committee kawa pait ya i thaw næ ah kilo ha Iewduh khnang wow pynchitom ya kiwa ksih dor ya ki warep.
Hawa jubab ya ini, u Executive Member (EM) wa pait ya ka yaw u Jambor War da ong u wa ka Council ka da chim ko ki laad ki luti wow pynsangeh yei chah lehbeiñ ki warep ha Iewduh wa da pynkup ha ka Hima Mylliem. Tangwa neidaw wa wa kani ka kaam man ko kawa da rim bha wei daw chitom wow leh wei ka Council ka dang thooh laad thooh luti ki kammon wow rap pynkhlan wow pyntikna wa ki warep ym toh u chah ban beiñ.
Katwa u Dy. CEM u Pyniaid Sing Syiem da pynrap u wa ka Council ka dang bichaar wei dang paitbniah ko wa ki warep ym toh u chah ksih ki ym du ha Iewduh kamjooh cha nongkyndong leh.
U Pyniaid da ong u wa ka Council daw chna ko ki laad kammon wow kdoh u khoom ya kiwa khayi kiwa na baar yow lait ki u leh katwa kwah ki.
Discussion about this post