Jowai: U Hep Dhar u khon yong u (L) Saron Rymbai waka Sharmai Dhar naka chnong Nartiang West Jaiñtia Hills District, da chah jied u kam u Dolloi wa pura ka Elaka Nartiang hadien wa jop u ya u yaki ar ngut kiwi won wa yeiñ pyrchah ya oo wa kynthup ya u Salong Lamare wa yeiñ haka chap ka sngi wa u Jonting Dhar wa yeiñ haka chap ka sim (Sparrow).
Yei thap Vote da pynman haka 26 tarik uni u bnai wei yaka ñiaw Vote won da pynman ynne ka 29 tarik ha MDC Hostel Jowai, heiwa u Hep Dhar wa yeiñ hei chap u Khloor da jop u da 381 Vote ya u kyrtong wa wan wa ar u Salong Lamare.
Yaka Result da pynbna da ka E. Shylla Returning Officer ka JHADC, chirup i emlang ka D.D. Syngai EAC, West Jaiñtia Hills District nalor ki sahep waphær waphær ka JHADC wa kiwi kiwi.
I em kiwa thap Vote hapoh ka Elaka Nartiang na waroh 35 tylli ki chnong da poi ko 6848 ngut, kiwa wan thap Vote won poi ki kamwa 5687 iwa mut 83% da mih kiwa thap Vote.
“Kam u Pa yong ka Elaka i kamram yong nga toh yow pait yei bha i miat yong ka Elaka hi waroh kawi salonsar, nadooh kiwa dooh wa mahajon wei kamwa da pynkup ha nga ka bor, yooluti O wow ye u bichaar yei bha i miat wai lait nei pynthut,” ong u Hep Dhar hawa yaklam wa kiwa thoh khubor.
Kamtæ khut u ya i yakrehlang yong waroh nadooh kiwa kyrchaan waki wym em kyrchaan kamjooh, wym toh u em iwon iwon i sñiaw phær tangwa deiwi i sur u yakrehlang, neibhah i yakrehlang i yatylli lang wanrah ko yei jop.
Discussion about this post