Jowai: Kam ka dak wow burom ya ka tawiar soodong sookun deiwa sikai ya ki khynnah skur wa kammon u lehkhooid, ka Dorbar Chnong Tuber, East Jaiñtia Hills chiruplang wa kawi na ki tnat krehkaam ka chnong, ka VDP ynne ka 30-07-19 da pynman ko ya ka yalang tbian ha skur Tep Kyndait Government U.P. School, Tuber Kmaichnong weiwa da e sñiawbha leh ya ki Tin noh jhep cha ka skur.
Ya ka yalang da pyllai da u Riquoma Rq. Laloo, Headmaster uwa damait phang hei yatoh wa kammon ki khynnah skur toh u tip ki u leh khooid ya ka skur kamjooh ki luti syngkieñ chnong. Da yoh yei klam na u Wanthmu Phawa u waman kam u Advisor ka chnat krehkaam VDP ka chnong heiwa da kyntu joor u ya ki khynnah yow tip ki u syndong yei rukom im yong ki, nadooh na yung hadooh ha skur heijooh i por u man ki, kiwa tip u pynemkaam ya ki Tin wa da e sñiawbha da ka chnong lyngba ka VDP.
Khaddooh dayoh yei klam tbian na u Waheh Chnong ka chnong Tuber, u Jied Sana, uwa da kyntu ya warohlang nadooh kiwa sikai kamjooh ki khynnah yow ya krehlang wa ka chnong weiwa kyntu u yow ye u pynman ya ka chnong Tuber kawi na ki Model Village hei yatoh wa i khooid i jngiar deiwa maham joor haroh u, wa ymhoi u noh pathar yeiwon iwon i jakhlia jakhlait cha sarok, chooh chooh lada chem ya kiwon kiwon kiwa pyrchah khamtam ki khynnah skur toh u pynchitom katkam ki aiñ chnong. Khut haroh u yei yakrehlang ymtoh du kat kiwa sikai wa ki khynnah skur chiruplang wa kiwa wan walai cha ka chnong deilang wa ka chnong hi waroh kawi yow tip wa, i khooid i jngiar toh iwa emkaamdooh hei manbru yong i. Da e kti u ya ki Tin noh jhep ha u Headmaster deilang wa ki School Captain haphrang ki khynnah skur.
Da e ki kyntien e khublei na u Headmaster ka skur deiwa khutlang u yei yakrehlang yong ka chnong chirup wa ka skur ha waroh ki liang.
Discussion about this post