Jowai: Ka Khasi Students’ Union (KSU) da thoh ko cha u Dr. Ramesh Pokhriyal Nishank u montri ka Human Resource Development ka sorkar India heiyatoh wa i sñiaw yong ka seiñ ya ka Draft National Education Policy.
Ka seiñ da sñiaw ko wa i wan bait ki kyndon naka sorkar pyrdi heiwa ki sorkar jylla hap ki wow bood da man ko pyrchah yei rukom pynlai ya ka ri heiwa ki jar jiar ki jylla sñiawthooh ware ki yei rukom man ka kaam puræ puthi, kamtæ ka sorkar pyrdi ye ko wow booh ya ki kyndon tangwa toh u e laad ya ki sorkar jylla wow chna ki ki yong ki hi ki luti yow poi cha ka thong ka Policy kamjooh ya iwa emkaam kiwa lai puræ.
Ka KSU ym em sñiaw yahap ko wow pynku ya ka ktien Hindi deiwa pynduna yeiwa emkaam ka ktien English neidaw wa ka ri India man ko kawa pynemkaam boon jait ki ktien wei toh u pynchlur ya ki ktien wa pynemkaam ha ki jar jiar ki thaw wei ym toh u pynbor wow pynekaam ya kawon kawon ka ktien hapoh ka ri.
Ka seiñ da ong ko leh wa i pynjrong ya ka Pre-Primary Schooling cha ka 3 snem daw man hawa kut da tam chi snem i hap lai puræ na iwa jooh iwa daw ktah kam ya ka jylla Meghalaya kawa dooh.
Chooh chooh ka seiñ da ong ko wa deiwa pyrkhat yei boon ki jaitbru hapoh ka ri kiwa em jar jiar ki parom wa da khana pateiñ la pateiñ, ka dustur ka riti, ki khla wait; kiwa katni ym em thaw ki ha ki kot puræ ki khynnah hapoh ki skur hapoh ka jylla kamtæ emkaam wow pyrkhat yeini leh.
Ka KSU da ong ko leh wa emkaam wow pyrkhat leh ya i yoh i kot ki paidbah, wei da paan por chooh chooh naka sorkar yow yohlaad ki paidbah wow pynsñiaw chaphang kani ka Draft Education Policy chwa wow pynkrehkaam ka.
Discussion about this post