Khut sñiawbha ka Raij Muthlong cha ka Behdieñkhlam ka wow pynman haka 7 wa 8 tarik

Jowai: Kamwa jooh leh man u snem, ka lehniam Behdieñkhlam Festival 2019 yong ka Raij Muthlong, ha uni u snem u sdang ko nadooh ka 7 tarik wei u kut ko ha ka 8 tarik uni u bnai, ka wow man ha Syiem Biar Nohrong ka Raij Muthlong ha Thadmuthlong.

Kani ka lehniam da man ko hadien wa ki khon ka Raij da dep ki wow bet ya u Symbe u Phniang, u kba u khoo yong ki cha ki hali pynthor. Ka lehniam ka Raij da sdang ko da ka lehniam sang sngi ‘Shain’ kawa man ka lehniam neibynta wow kyrpaad ya uwa booh wa thaw yow beh ya i kjut i chitom.

Yaka lehniam da pyndep ha waroh soo tylli ki liang wa ka lehniam ‘Wator Symbei’ neibynta wow bha wow miat u kba u khoo, daw em ka lehniam kawa tip kam ka lehniam ‘Chawah–Chaneiñ’ kawa mut wow khanglaad ya i kjut i chimtom wow wan chapoh chnong poh thaw.

Haka 7 tarik daw em ka chaad Talawiar Chnong kawa mut wow e ngooh e dem ha waroh ki dong ki chnong, yow kitbok kitrwiang yaka chnong ka thaw waroh, katwa ha ka sngi khaddooh ha ka 8 tarik daw em ka ‘Sang Sngi Khlam’ kawa mut wow khanglaad ya i kjut i khlam, wei yaka lehniam u leh da u Chutia ka Raij Muthlong ha i por wa dang step, katwa ha i por 1:00 waje i sngi daw pynpoi ya ki rong ha Syiem Biar Nohrong heiwa daw em ka chaad yonglang waroh ki khon ki hajar ka Raij Muthlong wa ki khon hajar ka jaitbru ka bri u Ynñiawtrep wei wow wan noh ya ki rong.

Related posts

Da rah tarik ya ka General Meeting ka Kur Sana kawa daw pynman ha Jowai

May 7, 2025

Ym chah ya kiwa wan dai baam ha ka Chaad Sukra ka Seiñraij Chnong Tuber Kmaichnong

May 3, 2025

Heiyatoh wa kani ka lehniam Behdieñkhlam, ka Seiñ Raij Muthlong da khot da wer lang ko ya waroh ki khon ka bri u Ynñiawtrep wow wan sakhi lang ya kani ka lehniam Behdieñkhlam ka Raij Muthlong khnang wow man ko kawa chongshit wa chongkun.

Ka Seiñ Raij Muthlong da khang ko leh wa ym chah ya kiwon kiwon ki bru kiwa na baar ne tre chnong wow dai ya kiwon kiwon ki jait wa pynmuaid hapoh ka chnong ka thaw næ wow wanrah na baar, wei wow leh namo wow pynman ya kiwon kiwon ki program ki wym yahap khlem da yohbor na ka Seiñ Raij, lada chem ya ki, ye wow pynchitom ya ki katkam ka aiñ, wei ym em i maap, ong ka kyrwoh phah lyngba kiwa kitkaam ka Seiñ Raij Muthlong.

Da kyrpaad leh ya waroh ki paidbah kiwa wan sakhi ya ka lehniam Behdieñkhlam ka Raij Muthlong wow ya krehlang wa ka seiñ wei wow man ki kiwa tipbru tipblai.