Jowai: Ka North East Forum for Indigenous People (NEFIP) da thoh ko cha u montri rangbahdooh ka ri u Narendra Modi ynne ka sngi neibynta ki 7 tylli ki jylla kitæ ka Assam, Arunachal Pradesh, Meghalaya, Manipur, Mizoram, Nagaland wa Tripura yow pynsñiaw yei ktah ka Citizenship Amendment Bill kawa thmu wow pynman tre ri ya ki baar ri kiwa man kam ki Hindu, Buddhist waki Jain kiwa em ha Pakistan, Bangladesh wa Afghanistan.
Ka NEFIP da ong lada man aiñ kani ka Bill daw wanrah ko i kylla iwa da man chwa katni iwa da ktah ya ki tre jylla kini ki 7 tylli jylla nei wan psiah ki baar jylla wei kani ka Bill man ko leh kawa tyngkheiñ yaka Article 14 ka Constitution ka ri kamjooh yaka rai wa nakhmat dooh ka riti synchaar ka ri kawa tip lem kam ka Preamble.
Da pynsñiaw leh daw man ko kawa sepai yei pynkrehkaam yaka NRC wa da pait da ka Supreme Court wow tipmit ya kiwa ym toh ki tre ri ha Assam katkam ka Section 6A ka Citizenship Act, 1955 katkam ka Assam Accord ka 1985.
Da ong leh wa man i iwa bakla wow pyrkhat wa ki le niam wa pdiang ka CAB toh kiwa chah pynchitom ha ki ri yong ki neibhah ki man ki ki bru wa lai kat chawa em i khih i khan.
Hanlada ki waheh ka BJP da kular ki wa kani ka Bill ym ktah ko ya ki tre jylla, tangwa ka NEFIP da ong ko wa katni hadooh 80% ka khayi pateiñ da ksoh da ki baar jylla wei lada wan ka CAB daw pynjoor chooh chooh ko ya ini i kaam hadooh wow khian paaid ki tre jylla hadooh wow wiar jait ki.
Da antaad wa hadooh 4 Million ngut ki baar ri kiwa em katni du ha Assam kiwa ym ye u e ya ki wow man ki kam ki tre ri tangwa ka CAB won da kwah ko wow wanrah chooh chooh ya ki baar ri wow man kam ki tre ri.
Ka NEFIP da kylli ko leh wa na iyi i daw wa ka sorkar India pyrkhat khia ko ya ki baar ri wei da mylliñ ko ya ki tre jylla kiwa da em nadooh ki por warim wa jah.
Discussion about this post