Khliehriat: Ka Umlyngsha Youth Society and Sports Club (UYSSC), Elaka-Lakadong, East Jaiñtia Hills District Khliehriat da pynman ko ya ka lympung yalehke kawa tip kam ka “Umlyngsha Inter Dong Football League 2019” ha kani ka 15 tarik uni bnai ha Madan Lumthangiong, Umlyngsha.
Ha ka yalehke wa nyngkong da pynman heipor 2:00 waje nohchariñ sngi hapyrdi ka Dong Main Road BBJ FC pyrchah ya ka Dong Khadlynraw FC heiwa ka yalehke da man ko ka yathaaiñ bha heiwa nyngkong ka Dong MRBBJ FC da yoh chwa ko u pynkhih ya ka jaar lyngba u Victor Shadong hadooh ar kool ha kani yalehke, chikool na u Pyiarly Shadong tangwa ka Dong Khadlynraw FC da yoh ko u thap lyngba u Yowan Shadong 2 kool, u Briwell Suchiang 2 kool heiwa ka yalehke da kut ko da 3-4.
Ha ka yalehke kawa ar won da yakhun heipor 3:30 i janmiet hapyrdi ka Dong Loom Pyrdi FC pyrchah ya ka Dong East Colony FC heiwa ka yakhun da kut ko 0-0, ha kani ka sngi heiwa ka yalehke da man ko kawa yoosuk wei ya ryngkat bor markylliang.
Ha kani ka sngi da wan wai ya kani ka lympung da u Tbn. K. Shylla kam u kongsan, u Waheh T. Dkhar ryngkat i emlang ki dkhot yong ka Club heiwa ya ka yalang tbian chwa u sdang ka yalehke da pynlai da u Namphrangmi L. Talang kam u Genl. Secretary Club uwa da pynsñiaw yei angood ka Club wow pynlai chaphrang ya kani ka lympung heiwa myntu u snem da rai wow e ya kiwon kiwon ki Dong wajop wa rem ryngkat ka Trophy, Medal waka song poisa.
Neiliang u T. Dkhar da e yei kyntien sneiñ ya waroh ki Dong wa chimbynta ha kani ka lympung Inter Dong khamtam ya kiwa yalehke hawa man uwa yalehke emkaam u em i mynsien yakhun tangwa ymhoi u em i mynsien bichni ya ki paralok ha madan khnang yow poi cha ka thong.
Chooh Chooh da kyntu u ya kiwa yalehke wow man ki kiwa yahluti namo wow e i yalehke ha madan u man i iwa yoosuk dei em mynsien yatylli ya maap kylliang neibhah kam ki bru em chiboon i duna i bakla hei man bru yong i man ka sngi.
Khaddooh chwa wow sdang ka yalehke neiliang u Tbn. K. Shylla da e u kyntien e mynsien ya waroh kiwa chimbynta hei yaleh deiwa ong em kiwa jop wei kiwa rem tangwa ymhoi u yaboh ya ksohnood heiwa da booh leh ya i duwai ha chwa u sdang ka yalehke khnang wow lait nei ma nei mynsoo hapyrdi kiwa yalehke ha kani ka sngi wei chi lynter kani ka Lympung.
Kani toh katkam ka khubor wa pyllait lyngba u Wellmiyo Syrti, President ka UYSSC, EJHD.
Discussion about this post