Jowai: Ki dkhot yong ka Meghalaya People United Front (MPUF), East Jaiñtia Hills District, ynne ka 21 tarik ha i yahkhmat u Kyrshan Blah, President Khliehriat Circle deilang wa kiwi de ki dkhot da lai e yarap ki da i khyndaw-bilat cha kawi ka manyung wa dooh, ka yong ka Meris Dkhar, kawa chong wa sah ha ka Dong Khliehdupon Ladrymbai, East Jaintia Hillls District.
Ha chwa wow e kti ya ini i mar cha ka tre yung, da em ka yalang kawa tbian kawa pynlai da u Hamwer Bhoi, Publicity Secretary, heiwa da yoh leh ya i klam na u Kyrshan Blah, uwa da ong wa ka seiñ ka e yarap wa i kyrchaan cha kiwa dooh katwa i bor wa ye ki cha kitu kiwa emkaam sakhiat wei da kyntu leh ya kani ka man yung wa toh u pynemkaam hok ya i e yong ki hanlada man i iwa khian leh. U Blah da ong u leh wa neiliang ka seiñ u pteiñ ki wow e yarap cha kiwa dooh kiwa emkaam hok ya i yarap katwa ye i bor, wei da kyntu u leh ya ki bru wa ki ym toh u chaniah du haka yarap yong kiwi wei ki leh toh u man ki kiwa kreh chitom ha kawon kawon ka kaam kreh ki.
Neiliang u Michael Chyrmang President MPUF-EJH, da ong u wa kam kiwa yahkhmat ka seiñ ki leh man ki kiwa dooh wei i e yarap yong ki man ko kam kawi na ki kaam wa leh ki. Da kyntu u leh ya ki dkhot yong kani ka manyung wa ki toh u kreh chitom hanlada ka kaam man ko kawa khian wei wow kreh hok yaka kaam, da ong u leh wa i toh u pait i yaka nongmuna yong ki dkhar (baar jylla) wa ki wan kamai chapoh ka jylla yong i haki kaam wa khian wa nai leh, tangwa da i kreh chitom yong ki ki dap ki biang ki.
Ka seiñ ha kani ka sngi da pynkynmoo ko leh wa ha u bnai wa da dep, ka seiñ da yohlaad ko wow yarap cha kawi ka manyung wa dooh ha ka chnong Kuliang (Umkiang) da ka ki tin sap yung.
Discussion about this post