Jowai: U Dawan Lyngdoh, MDC yong ka Moobakhon da wai u yaka e sikai kawa yatoh wa ka rukom rep Integrated Farming haka chnong Ksehrynchang, West Jaiñtia Hills haka 20 tarik yong uni u bnai.
Ya kani ka e sikai da pynman da ka Society for Urban and Rural Empowerment (SURE) hei ya krehlang waka Bethany Society lyngba ka Meghalaya State Skill Development Society (MSSDS).
Hawa klam kam u kongsan ha kani ka yalang, u Dawan Lyngdoh da kyntu u kiwa yoh ya kani ka e sikai wow chimkhia ki wow pyndep ya ka e sikai wei wow pynkrehkaam leh ya iwa yoh sikai ki khnang wow ku ki haka rep ka riang wei wow ku leh ka yoh ka kot.
Hawa klam wai phang, u H.H. Mohrmen uwa man uwa yahkhmat ka SURE da ong u wa daw e sikai hadooh 16 jait ki rukom rep wa ki bynta kiwa emkaam wow pynroi wow pynbha ya ka rep ka riang ki nongkyndong. U kynthup yaka rukom rep kawa khut kam ka Natural Farming wei ka rukom ri mrad won toh kawa khut ka Bokashi wei nalor ini daw sikai leh ha kawa yatoh wa kammon u pynkylla baam ya ki soh ki pe kiwa mih ha ki chnong ki thaw.
Palat le phaw ngut ki manbei da ya chimbynta ki ha kani ka e sikai, wei neiliang yong u Waheh Chnong u Malbi Timung da sñiaw sarong u wa ki manbei kamjooh ki khyllood ka chnong kiwa da smat wow chim kabu ya kani ka kaam.
Ha kani ka yalang da da emlang leh u L. Niang uwa man kam u Assistant Director Horticulture West Jaiñtia Hills, u Dr. D. Paswet u Senior Scientist na KVK, Jowai, u S. Slong BPM ka MSRLS wa ya ka yalang da pynlai da u Mardaoo Mynrchiang u dkhot yong ka SURE wa ya ki kyntien e khublei da e da u Habandajop Lyngdoh naka SURE.
Discussion about this post