Pynkup burom ka KSU-War Jaiñtia ya kiwa leh bha haka SSLC wa HSSLC da ka Maitshaphrang Academic Award

Jowai: Ka Khasi Student Union-War Jaiñtia Circle ha ka 24 tarik uni u bnai da pynman ko yaka pynkup burom kawa tip kam ka 2^nd Maitshaphrang Academic Award 2019 cha kiwa puræ ka thaaiñ War Jaintia kiwa da leh bha ha ka Exam SSLC wa HSSLC.

I thmu yong ka seiñ wow saam ya kini ki khusnam toh wow pynchlur wei e mynsien ya ki khynroo khyllood wa dang lai puræ yow nang lai ki cha ki kyrdan wa chajrong.

Ha kani ka sngi da emlang ka J.U. Kharpuri kawa man kam ka kongsan wei da emlang leh u Readyonstone Nongrum, Education Secretary seiñbei, u Ruben Najiar, General Secretary Laban Circle, u Shiningstar Kharbihkhiew, President KSU Mawryngkneng Circle, u Pynshai Dkhar, KSU NEHU Unit, u Ohibait Dkhar, President JHDU, u Leningrad Tariang, Organising Secretary JHDU, u Morningstar Pasi, Assistant Publicity Secretary JHDU wa u Lasting Lamin Gadew.

Ha chwa wow saam ya ki khusnaam da pynman chwa ya ka yalang wa da pynlai da u Aurora B. Pamksang, Assistant General Secretary War Jaiñtia Circle, da yoh ya i klam waiphang lyngba u President u Laitphar Syngkrem, da yoh leh ya ki ktien kyntu kynpham na u Ohibait Dkhar, u Readyonstone Nongrum uwa da yaroh ya kiwa lai puræ ka thaaiñ War Jaiñtia heiwa da ye ki u leh bha ha kani ka Exam kawa katni wei da kyntu u ya ki leh wa ym toh u kut du kamni wei toh u nang kreh chitom chooh chooh neini cha khmat khnang wow yoh u khait ya u soh wa thiang yong i jop.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Neiliang ka kongsan ka J.U. Kharpuri da yaroh ko ya ka seiñ kawa da ye u pynman yaka 2^nd Maitshaphrang Academic Award 2019 kawa man iwa pynchlur ya ki khynroo khyllood wa lai puræ ka thaaiñ War Jaiñtia, da ong ko leh wa ha ki kam kini ki por emkaam bha wow syndong ha iwon iwon wa leh i khamtam ha ka juk kawa katni neidaw wa ha ka juk wa katni ki sih man ki kiwa hajan tam yong ki khon khynroo khamtam wow kiar na ki jait dih pynmuaid neidaw wa boonsien manda kyrni i dih da wanrah ko yei sepia i im yong samen wei ha ka imlang sahlang, kamtæ neiliang ka Kharpuri da ban joor ko leh ya ki manbei manpa wow pait bha ym toh wow e laad pathan ya ki khon wow laitlan ki hadooh wym tip de ki bei ki pa ya iwa leh ki.

Kiwi kiwi de kiwa e yei klam ha kani ka sngi kyntup ya u Leningrad Tariang, u Ruben Najiar, u Lasting L. Gadew wa u Shiningstar Khongiong, Education Secretary War Jaintia Circle.

Ya kani ka kyrwoh da phah da u General Secretary ka KSU War Jaiñtia u Lurman B. Talang.