Da pynkha yaka Hill Farmers Union Rongrong Block yow kreh neibynta i hok ki warep

Jowai: Ka Hill Farmers Union (HFU) Central Body ha i yahkhmat u President u Commander Shangpliang da lai hiar ki cha West Garo Hill ha kani ka 24 tarik wa da dep yow sñiawthooh yeiwa emkaam ki warep ka ei-loom Garo.

Ha kani ka sngi da pynman leh yaka yalang ha Jengjal kawa em ha Rongram Block, heiwa da wan embynta lang da ki spah ngut ki warep. Ha kani ka yalang kiwa yahkhmat ka Union u Commander Shangliang, President wa u Alfondbirth Kharsyntiew, General Secretary da klam ki chaphang ki thong yong ka Union kawa da krehkaam kattu la 2 snem.

“Da wan i heini yow yachem wa phi ki warep ym toh yei myntoi samen yong i, da wan i heini yow pynkyrsu thiah ya ki warep ka ri-loom Garo kiwa dang yoh thiah kiwa em i sur, wei da toh i por wow yatylli land kam ki warep da iwi i sur ya iwa emkaam ya i,” da ong u Alfondbirth Kharsyntiew.

Neiliang u President ka HFU Nongstoin Block da khana u ya ki kaam wa da ye ka seiñ u leh kam wow pynsñiawthooh yaka sorkar jylla wow sdang ko yaka Meghalaya Farmers Welfare Commission wei wow tipmit ya u murit, sla tyrpad wa ya u saroo kam ki mar rep kawa da dawa haka Farmer Parliament kiwa da pynmanha ki snem wa da dep.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U President ka HFU Central Body u Commander Shangpliang hei klam yong oo da ong u wa ki warep hapoh ka jylla man ki ki jooh wei ym toh u e laad ya kiwa kwah u wanrah yei sñiaw yaphær. Da ong u leh wa ka Union i thong yong ka ym toh du wow pynsñiaw ya iwa emkaam ki warep wei wow e leh cha ki warep yei stat i tip wow rep kam ka juk kawa katni wei heijooh i por leh wow thooh laad kammon wow dai ya ki mar yong ki.

Chooh chooh da ong u wa da yooluti wa ka sorkar daw pdiang ko ya waroh ki dawa katkam wa da booh heipor wa pynman yaka Farmer’s Parliaments. Da pyntip u leh wa yaka  2^nd Farmer’s Parliament, ka Union daw pynman ko ha ri-loom Garo.

Hadien wa kut ka yalang da jied leh ya ki dkhot ka Executive Committee ka HFU Rongram Block. Ya u President ka HFU Rongram Block da jied ya u Micheal G Momin, Vice President u Dalsing Samgma, General Secretary u Bonseng Marak, Assistant Secretary u Chakman Marak, Treasurer ka Albina Marak wa 15 ngut ki Executive Members.