Shillong: Hadien wa ka Khasi Student Union (KSU) da yoh yutip ko yeiwa jia ha ICFAI, Agartala ynne ka sngi ryngkat wa ki manbei manpa ki khynnah puræ da lai yachem ki ya u montri ka chnat IT ka jylla, u Hamletson Dohling uwa da yah ya ki wow yachem wa u montri rangbah ka jylla, u Conrad K Sangma.
Hadien i yachem u President ka KSU, u Lambokstarwell Marngar da ong u wa ka seiñ sñiawkhia ko yei awri awra wa mih ha kani ka thaw puræ ha Agartala heiwa da ong u wa neiliang u montri rangbah da kular u wow chimkhia yeini wei daw phah ya ka dhab na ka sorkar ryngkat wa kiwa hayung ki khynnah puræ wow laipait yei man i long ha Agartala.
U President ka KSU da ong u wa lada jia iwon iwon ya ki khynnah na kani ka jylla, ki Bengali hapoh jylla toh u bahkhlieh ki neibhah ka seiñ ym suki ko tangwa daw jubab ko lada emkaam.
Uwi na kiwa hayung ki khynnah ha ICFAI Agartala da ong u wa daw lai ki mynstep i sngi cha kani ka thaw wow yoo dei yong ki hi ki khmat yei man i long wei wow bichaar lada man iwa chngaaiñ ya ki wow puræ ha katai ka thaw.
Da ong u wa katkam ki khubor na Agartala pynyoo ko wa i jia man i iwa chyrkhei ha kani ka thaw puræ, tangwa ympu che ware neibhah em kiwa kam wa ye ki u man du ki khubor thok donhi.
Discussion about this post